舊年11月立法會九龍西補選，之前因為宣誓玩嘢被DQ嘅劉小麗因為「自決」、「港獨」立場被選舉主任DQ，劉小麗日前向傳媒表示，佢將會喺下星期期限屆滿前提出選舉呈請，仲話預料守護公義基金會負擔部份訴費，至於餘額就會向市民眾籌。廣男實在好奇，劉小麗嘅「自決」甚至「捍衛港獨為選項」嘅立場已經係人所共知，畀人DQ可以話合情合理；佢而家因為自己無資格參選而提出選舉呈請，而仲想市民同佢一齊找數，唔係呀？

選舉主任「亂判」劉小麗？

根據劉小麗向回覆傳媒嘅講法，佢話選舉主任喺冇充份證據下，胡亂判斷佢嘅立場，扭曲咗佢政綱等等，所以要挑戰選舉主任嘅DQ決定。劉小麗係咪「自決」、「港獨」嘅立場係咪真係咁難判斷呢？首先，喺2016年立法會選舉前，劉小麗就同朱凱迪、「香港眾志」發表過聲明，表明佢哋嘅共同政綱係「民主自決」、定必「香港獨立作為港人自決前途的選項」；好明顯，劉小麗所支持嘅「民主自決」，絕對係包含「港獨」作選項果種。

講番近啲，就喺上年立法會九龍西補選前一段時間，就有傳媒踢爆劉小麗喺佢個人網頁最少有兩個包含「自決」嘅頁面消失咗，涉及字句包括「香港人固然應該政治自決」、「香港人有政治自決的權利」和「為香港爭取前途自決」等；當劉小麗一而再甚至再而三地講「自決」，而「自決」又包含「港獨」選項嘅時候，到底係選舉主任，「亂判」劉小麗嘅立場，定係劉小麗嘅政治尤其係「自決」立場太明顯呢？廣男相信市民懂得判斷。

小麗惹事 市民埋單

至於劉小麗要守護公義基金同向市民籌錢打官司嘅問題，廣男就覺得劉小麗明明係因為自己政治立場唔符合法律要求而被DQ，佢到底憑乜嘢要市民幫佢「埋單」呢？仲有喎，點解劉小麗咁執意要挑戰選舉主任嘅決定？佢係想攞番個公道？廣男就覺得，如果劉小麗一日冇Show到比人睇佢嘅政治立場已經明顯改變、放棄「自決」，又或者唔提選舉呈請兼打贏官司，佢之後想再選立法會都好難；如果今次市民捐錢畀佢打官司，劉小麗又「咁好彩」打贏，咁下次佢就有機會再選立法會。到底要唔要出錢幫劉小麗鋪路再參選，真係要睇大家點諗呢單嘢。

圖片來源：RTHK