先旨聲明，用「怨婦」呢個詞，純粹因為民間約定俗成，講出嚟人人都明，當中絕冇性別歧視！好喇，何解突然會講起「怨婦」呢？話說特首林鄭月娥早排就住調高長者綜援門檻一事會見立法會建制派代表，反對派政客知道之後，立刻大發雷霆，質問林太點解唔見佢哋；到咗近日，特首辦主任陳國基回信畀反對派，講明因為林太離港在即，政府為咗盡快可以同反對派會面，決定安排署理特首張建宗接見反對派。正常不過嘅安排，隨即又令到一班「怨婦」大發脾氣，有激進派更表明考慮杯葛，據報反對派而家「願意」見張建宗，都係得幾個反對派員會出席會議，仲要講到「好唔滿意」咁款，陣醋味大到，真係鼻塞都聞到呀！

又要見官員 又表現得「不想見」

話說，反對派上星期去信政府，要求下個月一號之前同林太會面，特首辦主任陳國基尋日回信，邀請民主派本星期四（24號）會見署理特首張建宗。陳國基解釋，之所以有此安排，全因林太正身處瑞士出席世界經濟論壇年會，26號先至返香港，加上事先安排嘅種種工作，日程非常緊密，暫時未能安排時間同反對派會面。政府為咗盡快聽取意見，決定由署理特首張建宗同反對派會面，共商檢討綜援長遠安排。

陳國基回信後，據說部份反對派中人大為不滿，有人話杯葛、有人就建議只係由代表出席，以示不滿；事情發展到今日，反對派議員又話肯見張建宗，不過有反對派會議召集人毛孟靜表明「政府今次做法係故意貶低民主派」、「如果民主派不赴會，將被指小器，但應約並不代表事件結束，由於長者綜援是重要民生議題，為免令外界以為民主派意氣之爭，因此決定赴約」。大姐呀，政府個安排好正常喎！又係反對派班人自己要求「盡快」見面，又設下限期要下月一號之前見到政府代表，咁林太個人係飛咗去瑞士吖嘛，試當然就係由署理特首去見啦，其實仲有乜好嬲呢？一邊要見，一邊又要講到「被迫」咁款呢？當初唔係你哋想同政府傾清楚單嘢嘅咩？

反對派真係為民生？

老實講，無論係見林鄭月娥好，張建宗好，甚至係局長都好，反對派其實只係要就長者綜援問題提出訴求啫，講到見張建宗「好唔情願」咁，囍雨真係有啲懷疑反對派班人係為面子，定係為基層！如果真心為基層，畀著囍雨就會講「無論係咩官員都好，我哋一定要見」，而唔係一時要求呢樣，轉頭又話特首唔肯見佢哋。老實講，反對派口話唔係「妒忌」建制派有得見林鄭月娥，但從佢哋表現可見，佢哋確實係有啲妒忌喎；否則的話，佢哋應該對見張建宗都表示歡迎架，大家話係唔係先？

圖片來源：RTHK