成日聽人講，做地區除咗要勤力，仲一定要熟書，如果街坊發現自稱地區工作者，但其實根本唔熟區情嘅話，到選舉果時想人哋投票畀自己都幾難！廣男近日睇到一則「趣聞」，如果「好笑」程度可以分為十級（十級最高級），呢單起碼係第九級，事關民主黨立法會議員兼北區區議員林卓廷近日帶埋幾個社區人士去見九巴，要求人哋改善巴士線不足、脫班等問題，但就出現咗包括要求「277B儘快加班」嘅請願信。有眼利嘅網民就指出，九巴根本冇277B呢條巴士線，一傳十、十傳百，網友隨時開始瘋狂恥笑林卓廷同佢班黨羽。廣男好好奇，作為當區議員，林卓廷唔係連區內有咩巴士線都唔知呀？如果真係咁，佢仲邊有資格做北區區議員先？

議員唔熟書 網民狂恥笑

本來呢則「趣聞」就冇乜人知嘅，不過向來要Show off、話畀人知自己做「好多嘢」嘅林卓廷等人，自行將向九巴請願嘅相擺上Facebook，結果就畀眼利嘅網民踢爆，話根本就冇277B線，反問佢哋爭取乜嘢。仲有網民揶揄話，「五個一齊錯都唔知錯，仲要影埋相，仲要放埋上Facebook公佈與九巴會面成果，要幾唔熟書先錯到如此地步？我諗九巴都恥笑中。」事後林卓廷人仲要潛埋水，搵「手下」郭㙟豐頂住啲網民，話277B線只係「手民之誤」，講真，佢作為民主黨北區甚至新界東嘅「大哥」，團隊做錯嘢佢唔出嚟頂仲要推個「手下」出嚟畀啲網民鬧，好衰仔啫！

老老實實吖，雖然廣男唔係政客，但作為普通市民都應該知道，一個稱職嘅區議員，根本就無可能唔知區入面有啲咩巴士線，事關區議會入面有關交通運輸嘅委員會，好多時開會就係講啲巴士線有咩問題，係咪班次少、脫班，或者要求開咩巴士線滿足區內居民需要等等。林卓廷連區內有咩巴士線都好似唔係好知咁仲叫九巴為一條唔存在嘅巴士線「爭加班次」？真係想笑大人個口咩？

被嘲諷為「電話廷」

仲有一點，就係廣男今日上網睇呢啲關於林卓廷嘅發帖，先知原來網民幫佢改咗個花名叫「電話廷」，事關佢當年喺北區嘅石湖墟選區議員，揚言要「做返好」上水、石湖墟，要處理水貨客問題等；但原來處理啲藥房貨物阻塞通道嘅方法，就係要求附近啲電話亭搬走！有網民話佢本末倒置，有人甚至索性叫佢做「電話廷」。其實呢，一個議員成日唔做實事、只顧搞事，恐怕遲早都會被選民離棄架喇！ 

圖片來源：林卓廷FACEBOOK