盲反派炒作「UGL事件」樂此不疲，先後發起多次遊行集會，話要追究本身已獲證實係無辜嘅全國政協副主席梁振英，幸好香港市民心清眼亮，拒絕再獻身畀呢班政客利用，令到盲反派所有行動都爛尾收場。不過，身為盲反派喉舌、身負抹黑唱衰香港同特區政府「重任」嘅《生果報》同佢個「主筆」盧峯又點會善罷甘休吖，盧峯今日又再以「社評」為名發表奇文，為咗向梁振英潑污水，竟然大讚特讚以往畀佢自己同《生果報》鬧到狗血淋頭嘅前特首曾蔭權，再引用大量不準確論述去評論「UGL事件」，拉一派、打一派，盧峯嘅惡毒居心，可謂路人皆見！

盧峯奇文共觀賞

盧峯篇奇文講咩呢？簡單而言，佢以日前出獄嘅曾蔭權為切入點，大讚曾蔭權「從事公職超過四十年，盡心工作為民服務，任特首期間成功通過特區成立以來唯一一次政改，讓社會呈現較融和局面」、「此外，他努力確保香港財政穩健，成功在亞洲金融風暴退大鱷，又引領香港應對金融海嘯……」嘩，冇睇錯吖嘛，呢啲說話出自盧峯支筆喎，囍雨冇眼花、冇睇錯嘛？

先旨聲明，囍雨絕對認同曾蔭權為官幾十年，對香港肯定有一定貢獻；至於令佢身陷囹圄嘅案件，由於嚟緊五月終審法院就會進行「終極上訴」，故此囍雨亦唔會評論。囍雨想帶出嘅係，盧峯為咗攻擊今時今日眼中最大嘅政敵梁振英，不惜打倒昨日嘅自己，一反常態煲揚曾蔭權，講到底都只係無所不用其極要去抹黑誣衊梁振英。

盧峯社論自打嘴巴 仲打倒昨日嘅自己

囍雨咁講唔係無的放矢架，大家不妨FACT CHECK一下盧峯以往點睇曾蔭權，囍雨特地搵咗幾個例子，說明盧峯並唔係真心讚曾蔭權，佢只係想乘機踩梁振英啫：

- 2005年1月28號一篇題為〈審批程序不公 才是關鍵〉嘅社評裡面，盧峯係咁形容尚未做特首嘅曾蔭權：「偏偏曾司長對這些疑問、對這些質疑卻避而不談，只是一再強調政府要『多快好省』的建好數碼港。像這樣的解說怎可能讓公眾信服、怎可能釋除有關政府輸送利益的疑團呢？」

- 2005年9月24號〈小政府不需勞斯萊斯式總部〉：「也許特首曾蔭權先生及特區政府認為，蓋一座可以成為市中心地標的政府總部大樓可以樹立新政府的權威；也許曾先生及特區政府高層相信，蓋一座新的政府總部大樓可以洗刷政府形象、可以顯示香港進入『新時代』。但是，這樣的想法不僅錯、而且錯的厲害、錯的非常昂貴。」

- 2006年3月23號〈畸形政制催生福利主義〉：「在這個時期主政的、容許政府開支及福利開支的不是別人，是那個由四百人小圈子選舉產生的前特首董建華先生及他委任的財政司司長曾蔭權先生；而他們之所以大灑金錢、大幅增加開支，一方面是要顯示大有為的本色，另一方面也是希望透過派糖掩飾特區政府缺乏認受性的本質……」

- 2006年5月19號〈特首期望議員做yes-man？〉：「偏偏曾特首卻不肯承認本身的失誤、卻不肯承認政府的失誤，反而把那些為了維護公眾利益而反對西九計劃的人批評的體無完膚、把他們說成是毫無原則只懂出風頭的人，這怎麼公平、這怎能讓人信服呢？」

- 2007年6月24號〈香港特區成了「曾家」天下？〉：「曾特首向來奉行親疏有別的政策，對支持他的政黨及政治團體毫不猶疑的提供種種幫助。當整個政府變成『曾家班』以後，偏幫某些政黨、政團的情況只有更明顯、更厲害，這對未來的選舉，對未來五年的政治生態都不是甚麼好事。」

絕口不提審貪會 盧峯擺明玩抹黑

例子太多，實在不勝杖舉，大家有興趣自己慢慢搵；囍雨重申，搵返上述內容，絕對唔係無啦啦想踩曾蔭權，只係想帶出，盧峯呢個人反口覆舌，為咗達到一己政治目的，信口雌黃仲唔夠，仲要挑動建制派、愛國愛港陣營嘅矛盾，講到底就係為咗「政治」兩個字，連基本傳媒操守都唔顧，老屈老作，係都要律政司濫告梁振英先至滿意、先至心息，做主筆同傳媒人做到好似你咁，每一篇社評都懷住怨恨之心去寫，社評內容邊可能有公信力，又邊可能值得參考呀？

囍雨重申一次，除咗律政司經細心研究後，認為手頭上證據不確立，唔可能達到令梁振英合理定罪嘅機會外，就連公信力極高，而且獨立運作嘅審查貪污舉報諮詢委員會亦認同，廉政公署已經進行非常徹底、絕冇遺漏嘅調查，最終同意可以結案。單係呢一點，監察同制衡力度已經肯定唔會比外聘資深大律師拎法律意見弱，盧峯喺社評提都唔提呢一點，不斷耍手段做小動作，目的係乜，心水清嘅香港市民一定明白嘅！

圖片來源：蘋果日報網站截圖