嘩，香港政界光怪陸離，真係一千歲成為在生都有新聞聽！講緊嘅係公民黨立法會議員陳淑莊，呢位盲反派要員、執業大律師，今日喺立法會大會上嘅質詢時間，發狂猛鬧律政司司長鄭若驊，話對方「隱瞞」曾經同前特首梁振英「共事」六年，認為呢一種關係已經涉及身份衝突，故此鄭若驊決定唔就「UGL事件」檢控梁振英前，就必須先取得獨立法律意見等等。廣男自問相當熟悉「UGL事件」來龍去脈，到底鄭若驊幾時有同梁振英「共事」呢？聽清楚啲，原來又係公民黨玩上綱上線式「老屈」，呢啲咁卑劣嘅手法，真係只有公民黨先做得出！

陳淑莊公然歪理當真理

陳淑莊嘅理據係乜呢？佢話喎，鄭若驊以往曾經出任交通諮詢委員會（交諮會）主席六年，而交諮會嘅職責，乃係就交通政策廣泛涉及嘅各項問題，向「行政長官會同行政會議」提供意見，而鄭若驊出任主席期間，梁振英正正係擔任行政會議召集人，故此推論出兩人曾經「共事」六年喎！嘩，層關係「疏」到呢，咁樣都可以扯上「關係」，真係只有習慣捩橫折曲、屈完再屈嘅公民黨先講得出！

講真吖，如果陳淑莊所講嘅「共事」都可以成立的話，咁即係全香港所有做公職嘅人都唔會有獨立身份同角色、所有做公職嘅人，好似反對派曾出任委員會委員，都係同政府官員連成一體，一起「共事」囉！陳淑莊係唔係咁睇？大佬呀，交諮會畀意見咋，點睇都冇可能係同行政會議一齊開會議事、點都冇可能係同政府一齊做執行工作啩？畀意見政府就叫「共事」，咁立法會又係唔係同行政會議一齊共事吖？

陳淑莊邏輯混亂 理據薄弱

仲有，再推論落去，香港法官都係由特首去委任架喎，咁即係所有法官都同政府有利益／身份衝突啦？部份法官任命，仲要由立法會任命添，咁所有涉及政府、政治官員或者立法會議員嘅官司，香港法院都唔可以審喎，一定要全部外判畀外國法院去審啦，利益衝突吖嘛、身份衝突吖嘛，係唔係咁先至滿意呀陳淑莊大律師？

老實講，只要稍有常識、肯用常理嘅人，都冇可能講出陳淑莊嘅言論，陳淑莊做得香港執業大律師，廣男唔相信佢係冇常識、冇常理嘅人，唯一可能性就係政治攻訐、屈得就屈！佢哋未必係最想屈鄭若驊，公民黨反而最想針對嘅，可能係政敵兼眼中釘梁振英啫，否則又點會明知審查貪污舉報諮詢委員會已經就「UGL事件」作出全面審查，證實冇CASE可言批准廉政公署結案，公民黨上下仍然日屈夜屈，質疑梁振英係獲得律政司「放生」？

到底係乜嘢令到滿肚墨水嘅公民黨，唔顧個人身份顏面，無中生有、歇斯底里咁誣衊梁振英呀？係想抽「政治」油水吖、定係明知廉政公署唔可以回應，所以肆無忌憚盡情亂吹呀？Well, WHY NOT BOTH？

圖片來源：RTHK