「如果廉署查CASE，都要考慮埋政治因素既話，咁香港就收檔！」嗱，古天樂喺《Z風暴》呢句對白就講得啱喇，如果廉署因為而家正值政改敏感時期唔查黎智英同工黨主席李卓人，咁仲成世界既？一個認咗畀錢，但唔知點解要透過前美國中情局僱員去捐；一班就收咗錢擺喺自己戶口八、九個月，畀人踢爆就話代黨收，咁都冇事？自從黎智英政治捐獻畀泛民單嘢被揭發後，廉署都仲收到唔少舉報，立案調查是常識吧！

無論咩人都好，尊重執法機構既調查工作，可謂天經地義；點知身為資深大律師既民主黨創黨主席李柱銘就仲癲，一嘢又推去「白色恐怖」度話廉署政治打壓，大佬，而家黎智英有冇捐錢先？泛民有冇收錢先？咁打乜壓呀？係執法呀，資深大律師！

至於嗰個公民黨立法會議員毛孟靜都唔好得幾多，一下子就質疑廉署咁做係轉移視線，話點解唔係上星期，又唔係下星期，偏偏喺京官討論政改就嚟調查黎智英，仲話係政治逼害喎！乜毛女士唔係做新聞出身既咩？冇證冇據憑咩有咁樣既評論呀？學古天樂話齋，廉署做嘢要考慮政治因素，香港收檔啦，毛女士！

唔好誤會，廣男咁講唔係篤定肥佬黎有問題，只係如果毛孟靜可以咁樣用懷疑論「硬砌」廉署既話，咁佢有收肥佬黎錢既嫌疑論就更大啦！毛孟靜做新聞出身，又係立法會議員，好應該知道「無罪推定」既原則，下下用感官式指控，咁樣對廉署好唔公平啫！

其實廉署收到舉報就要查肥佬黎，要查就難免會去肥佬黎、李卓人屋取證；如果要老屈廉署調查肥佬黎既Timing唔啱，老實講，要調查肥佬黎呢個泛民金主，幾時查你哋都話唔啱架啦，晒氣！

原圖：網絡圖片