幾日前盲反派搞咗個「集氣大會」，聲稱要「追究」全國政協副主席梁振英喺「UGL事件」嘅責任，廣男睇勻成個集會大會，只可以用五個字去概括：「無料扮四條」。明明律政司、廉署已經還梁振英清白，而盲反派亦完全無證據證明有人犯罪，咁追究啲咩呢？唔通係政治審判？廣男仲特別留意到，人民力量立法會議員陳志全發言嘅時候，話佢哋唔係要事件「告一段落」，而係要「告一個人」；講得啱，我哋係要告一個人，不過唔係清清白白嘅梁振英，而係極有可能因為披露廉署受查人身份而觸犯《防賄條例》第30條嘅民主黨立法會議員林卓廷！

沒有犯罪 何來放生？

盲反派堅持繼續炒作「UGL事件」，喺上述所謂嘅集氣大會以至其他場合不斷強調要「追究」梁振英，仲誣衊律政司司長鄭若驊嘅決定係「放生」；講來講去，廣男亦只係想問：一個人有罪或者罪嫌好大而唔告佢，或者可以話係「放生」，但如果一個人根本無罪，又或者控方根本冇證據證明呢個人犯罪，咁律政司決定唔告嗰個人，試問又何來「放生」？唔好忘記，呢個唔單止係律政司嘅單方面決定，廉署查呢件案查咗四年幾，查到無嘢可查為止，最後更要由極有公信力嘅審查貪污舉報諮詢委員會把關，確定廉署報告內容，認同真係冇嘢可以再查，先至可以結案。盲反派一味老屈律政司「放生」梁振英，講到底即係連審貪會、廉署都想屈埋一份！

林卓廷屢次涉嫌違法

陳志全咁高調話要「告一個人」，告邊個呢？梁振英？咁即係陳志全等人認為，律政司需要因應「政治需要」而濫告呀？計廣男話，要告嗰個點都唔係梁振英，而係一邊聲稱要「追究」梁振英，一邊周圍去投訴梁振英，但又不顧《防賄條例》屢次公開梁振英正接受調查嘅林卓廷。大家諗下，《防賄條例》第30條講到明唔可以披露受查人身份，林卓廷作為「UGL事件」投訴人兼前廉署人員，竟然為咗政治理由而屢次涉嫌干犯有關罪行，陳志全講得冇錯，我哋真係一定要「告一個人」，呢個就係明目張膽破壞法治、扭曲《防賄條例》嘅林卓廷！

誠如議會陣線毛孟靜所言，「Justice must not just be done, but must seen to be done」，如果林卓廷三番四次「擺明」犯法都唔駛被追究，以後仲有人信「廉署保密，密密實實」？以後廉署機密咪可以好似「娛樂新聞」咁，任人講、任人唱？所以為咗保法治、廉潔，廣男實在睇唔到有唔追究林卓廷嘅可能。最後，林卓廷喺「集氣大會」話自己對於某啲防賄條例「倒背如流」，廣男唔知佢可唔可以背埋第30條出嚟，再用佢前廉署人員嘅身份分析下自己有冇犯法，罪嫌有幾大呢？ 

圖片來源：RTHK