《國歌條例草案》鐵定下星期提交立法會，條例列明行政長官、行政會議成員、法官同立法會議員進行宣誓儀式前須奏唱國歌。盲反派議員一聽到上述要求，即時反射性反對，話擔心會成為DQ議員嘅理據，所以會提出修訂刪去「不合理」條文咁話。尋日，終審法院首席法官馬道立會見傳媒時亦被問到相關問題，馬官直言宣誓儀式是重要場合，奏唱國歌係「應該嘅」，亦唔會因此影響司法獨立同人人平等原則；馬官嘅回應，無疑係大大力咁摑咗盲反派議員一大巴，亦再次證明《國歌法》完全唔係法律問題，而係被反盲派上綱上線無限演繹嘅「政治炒作」。

馬道立：重要儀式奏唱國歌屬「應該」

馬道立點講《國歌法》呢？公平啲，我哋全文咁去睇；馬道立話，由於《國歌條例草案》尚未通過，加上日後法庭可能處理相關案件，故此不便評論太多，不過佢強調，無論係法律年度開啟典禮，抑或宣誓儀式，全部都係強調法官對香港法治承諾嘅重要場合，故此認為喺重要儀式奏唱國歌，佢本人覺得係「應該嘅」。

唔只咁喎，有記者追問，需要宣誓嘅海外法官或者唔識中文，咁又點睇呢？馬道立回應話，大家都要尊重國歌，因為海外法官同本地法官嘅誓詞係一樣嘅，兩者都係「香港法官」，況且奏唱國歌與否，本身亦唔會影響司法獨立、法律面前人人平等嘅原則。睇到啦，馬道立講得好清楚，馬道立認為宣誓儀式係法官對香港法治承諾嘅重要場合，故此喺咁重要嘅儀式上奏唱國歌係「應該嘅」；即係話，馬道立亦認同，喺宣誓儀式上奏唱國歌，不單止完全冇法律問題，而且仲係應有之義添。

不效忠特區　何必做議員

馬道立嘅回應雖然唔係衝住盲反派而嚟，但其實亦等同摑咗呢班政客一大巴，大家試諗諗，法官同立法會議員嘅「法定誓言」裡面，其實同樣有「擁護《中華人民共和國香港特別行政區基本法》，效忠中華人民共和國香港特別行政區」嘅字眼，播放國歌，其實亦係擁護《基本法》同效忠香港特區嘅體現；做得香港咁重要嘅公職人員（立法會議員），連宣誓前奏唱國歌都諸多推搪，諗盡辦法想去擺脫責任，一眾盲反派政客試問仲有乜嘢資格去做立法會議員呀？咁唔想向特區表忠，咪唔好選立法會議員囉！

《國歌條例草案》立法，本身就係勢在必行架喇，因為內地版本《國歌法》已經被納入《基本法》附件三，成為必須在香港執行嘅全國性法律，盲反派可以繼續盲反到底，逢中必反，但唔該唔好再搬埋晒啲歪理出嚟，話《國歌法》會妨礙言論自由、表達自由等等，呢啲咁反智嘅講法，全世界可能只有香港盲反派先講得出。香港市民，諗真啲，真係要繼續盲撐呢班人？

圖片來源：RTHK