盲反派炒作「UGL事件」四年有多，雖然律政司、廉署，同埋獨立運作嘅審貪會已經不約而同還咗前特首梁振英清白都好啦，但係呢班人仲係扮晒「聽唔到」，繼續揚言要「追究」梁振英，日前仲搞咗個「集氣大會」，繼續努力老屈梁振英。除咗一貫「得把聲，冇證據」嘅舊料外，廣男留意到一樣好有趣嘅嘢，就係當晚有份站台講嘢嘅社民連梁國雄（人稱長毛），不斷重複叫人「夾錢」，仲話係非常之「重要」。大家明白晒啦，原來盲反派搞呢個集會並唔係乜嘢「集氣大會」，反而係靠老屈梁振英去抽水、吸金嘅「集資大會」！

講咁多 又係錢？

盲反派政客堅持炒作「UGL事件」，但就愈炒愈「冇力」，基本上已經少咗好多人理佢哋，好似佢哋日前搞嘅「集氣大會」咁，就畀人笑佢哋又喺度「吹」大參加人數；廣男就覺得，佢哋「吹」大集會、遊行人數，基本上係「例行公事」，香港市民亦已經「見怪不怪」，反而有一點廣男覺得幾有趣，甚至可以話係幾肉酸嘅，就係梁國雄喺個集會發言嘅時候，竟然不斷重複叫人「夾錢」。又「夾錢」？「夾錢」做咩先？又畀你班人去外國「打卡」呀？

根據新聞報道同網上影片，梁國雄喺集會除咗擺定錢箱喺度之外，佢喺發言嘅時候叫人出嚟簽名、夾錢「登廣告」，聲稱啲人「要夾錢要落街」，唔可以「今晚講完就走」，仲話「非常之重要」（應指「夾錢」）。對於梁國雄三番四次叫人「夾錢」，廣男首先要問，一件司法事件，例如律政司因為冇證據或者證據不足所以唔告人，結案還人家一個清白，就算盲反派班支持者夾錢畀你梁國雄做簽名、登廣告又如何呢？夾咗錢就變到啲證據出嚟？以民主黨立法會議員林卓廷、尹兆堅等人搞嗰個「天下為公」為例，佢哋完全冇刑事調查權，但當日發起眾籌時就講到「有錢就會有料」咁，結果呢？捐款倒晒落鹹水海啦，多餘！

想用人治壓倒法治

另一個問題，就係「假設」梁國雄嘅講法係借籌錢、賣廣告而向律政司等施壓，咁係咪要用政治、民粹去壓倒法治先？即係話想用市民壓力，強迫律政司濫告無辜嘅梁振英啦！梁國雄自己都畀人告過公職人員行為失當罪，咩情況下有Case，咩情況下根本冇Case，佢應該比其他人更清楚先啱；佢用自己銀行戶口幫社民連收壹傳媒老闆捐款，再喺立法會幫人哋講說話最後都獲證清白，咁得到主事者授權洽談而且無利益衝突嘅UGL協議，又邊度有Case先？老實講，梁國雄咁強調要人「夾錢」，背後到底有咩理據？點解「捐款」後就可以強迫到律政司檢控？為咗政治理由而濫告無辜者，梁國雄覺唔覺覺得羞恥？ 

圖片來源：梁國雄FACEBOOK