前幾日盲反派搞咗個名為「集氣」、實為「集資」向市民籌錢嘅所謂「集氣大會」，聲稱繼續「追究UGL事件」；佢哋除咗繼續將已獲證實無辜嘅全國政協副主席梁振英假定為「有罪」外，專靠炒作「UGL事件」博出位嘅民主黨立法會議員林卓廷，更指控律政司司長鄭若驊「拒絕履行佢嘅責任，盡佢責任嘗試去『檢』梁振英」，又批評鄭若驊「用自己個人主觀意見去決定不檢控」。囍雨非常懷疑，律政司告唔告一個人，唯一可以斟酌同考慮嘅就只有「證據足唔足夠」，夠就告、唔夠就唔告，幾時有個法律責任係要「盡責任去告一個人」架？如果真係根據林卓廷咁講，咁律政司咪即係「政治工具」囉？連呢啲法律ABC都唔知，佢真係一個「前廉署人員」？定係佢為咗政治炒作，連自己講嘅嘢係咪合理都已經唔顧喇？

林卓廷又想老屈律政司

對於林卓廷指控律政司司長鄭若驊「拒絕履行她的責任，盡她責任嘗試去檢控梁振英」，囍雨覺得林卓廷首先應該搞清楚一個概念或者原則，就係律政司或者律政司司長嘅工作，絕對唔係「盡責任嘗試去檢控一個人」；相反，律政司研究一單個案時，本身絕對唔應該有前設。簡單而言，如果證據充足、有合理定罪機會，律政司當然要作出檢控決定；相反，如果冇證據或者證據不足，律政司亦唔能夠「為告而告」。如今，「UGL事件」好明顯就係屬於後者，林卓廷話律政司「冇盡責任」去告梁振英，擺明又係玩老屈，而且係曲解律政司嘅工作！ 

另一個問題，就係林卓廷老屈律政司司長「用自己個人主觀意見去決定不檢控」，講到律政司「隻手遮天」咁；須知道，UGL事件經過廉署四年有多嘅調查，可以話係「翻遍每一塊石頭」，除咗調查期間定期向審查貪污舉報諮詢委員會（審貪會）匯報進度外，當廉署、律政司唔檢控梁振英嘅決定再次去到審貪會作最後檢視時，公信力極高、權威性極強嘅審貪會（成員有律政司司長、廉署執行處首長、資深大律師、律師同各界社會人士等）都認同相關決定，否則審貪會絕對有權唔同意Close File。林卓廷而家咁樣講法，除咗係老屈律政司司長外，佢係咪又想講審貪會係「橡皮圖章」先？

為打擊政敵 無所不用其極

林卓廷為咗政治攻訐、人格謀殺梁振英，幾乎乜都講得出口，去到黔驢技窮嘅一刻，竟然連心裡面嗰句「律政司為咗政治理由無理檢控梁振英」都講埋出口，足以證明呢個人根本一心係想「釘死」梁振英，就算梁振英的確無辜、冇違法都好，林卓廷仍然堅持係要律政司濫告，咁佢先至滿意！囍雨覺得，唔該大家唔好畀佢轉移視線，「UGL事件」雖然已經告一段落，但喺「UGL事件」調查期間，林卓廷作為事件投訴人屢次向外披露梁振英「正受查」，違反防賄條例第30條有關唔可以披露受查人身份嘅罪嫌極大；正確嚟講，大家係要追究林卓廷先啱！ 

圖片來源：RTHK