盲反派炒作「UGL事件」，可以話係「從無間斷」，就算執法部門已經還全國政協副主席梁振英一個清白都好，佢哋一於少理，反正能夠吸引到支持者「眼球」嘅事，就算係漠視法治都好，佢哋亦一樣照做。噚日，喺立法會嘅行政長官答問會上面，作為現屆立法會「最資深」嘅議員涂謹申，竟然都炒作埋一份，話「慨嘆市民只能望着香港法治沉淪」，搞到特首林鄭月娥都忍唔住串番佢，話若然行政長官參與檢控工作，可能就係「法治淪亡的一天」。其他盲反政客要炒作「UGL事件」，廣男覺得呢班人要「搵食」啫，將將就就由佢啦，但當發言者係涂謹申呢種咁資深、仲要本身係律師嘅政客，廣男就真係睇唔過眼喇，竟然主動要求特首介入檢控工作，呢啲咁嘅建議都講得出，呢班人仲有冇理性架？

法治如何沉倫？

涂謹申就「UGL事件」追問林鄭月娥，如果佢質疑律政司同梁振英兩者會唔會有利益衝突，或者觀感上有關係，雖然都係憑空臆測，但都冇人阻到佢咁問；不過，當佢講到「慨嘆市民只能望着香港法治沉淪」，廣男就相當有保留喇，又係果一句，係咪因為盲反派政客對決定唔滿意，政府就要重新考慮司法決定，呢啲先叫法治？

涂謹申作為律師，應該好清楚香港係法治地方，無罪假定可以話係一種重要法律精神；當佢質疑政府、要求重新考慮要向外搵獨立法律意見果時，好容易畀人錯覺到事件「另有內情」，咁佢最應該做嘅，就係攞出實據，證明律政司決定有問題，再指「香港法治沉淪」；例如，UGL事件經過廉署四年多調查、律政司檢視證據加上極具權威性嘅審查貪污舉報委員會做最後把關（留意，審貪會入面有律政司長長、廉署阿頭、警隊一哥、資深大律師甄孟義、律師陳莊勤以至各界社會人士等），擺到明查晒、無Case先Close File，邊一度令佢覺得「法治沉倫」呢？

退一步講，如果涂謹申只係質疑律政司有利益衝突，認為係律政司唔外判法律意見就好有問題，再推到去「法治沉倫」咁嚴重，咁廣男又要問下佢，利益衝突喺邊度？鄭若驊同梁振英關係密切咩？係梁振英推薦佢做律政司司長咩？如果係林卓廷之流「亂嚟」，廣男都見慣喇，但涂謹申咁資深，表現竟然都係咁，把政治介入法治，就真係令人好失望囉。唔只咁呀，佢事後進一步要求林鄭月娥干涉律政司檢控決定架，呢種光天化日下破壞法治嘅行為，真係只有盲反派先做得出。

人治代替法治

廣男仲留意到，由於立法會UGL委員會準備中止工作，盲反派打算整個「少數報告」去「對抗」委員會嘅最後報告；廣男實在好奇，本身盲反派班政客用輿論「判人有罪」已經相當離奇，而家仲想整個「少數報告」出嚟，係咪要做埋律政司果份先？好心佢哋有時間就做下實事，或者提醒下自己友諸如公民黨楊岳橋記得開會仲好啦！老實講，法律精神明明就係有證據就告，冇或者唔夠證據就Close file，盲反派政客喺冇證據嘅情況下，係咁迫政府重新考慮搵法律意見甚至檢控梁振英，到底而家係要人治，定係要法治先？不斷誤導市民梁振英「有罪」，擺明就係玩「政治審判」！