千呼萬喚始出來，政府今日終於公布《國歌法》本地立法嘅詳細內容，表明若果有人「公開及故意篡改國歌歌詞、曲譜，以歪曲、貶損方式奏唱國歌，或以其他方式侮辱國歌，即屬犯罪」；正常不過嘅法例，偏偏有「大狀黨」之稱嘅公民黨，尋日喺連條文內容都未見嘅情況下，立刻跳出嚟話要「反對」，佢黨嘅黨魁楊岳橋話，《國歌法》未曾就「貶損」國歌作出清晰定義，而且會侵害言論同表達自由，公民黨一定會反對立法咁話。老老實實，楊岳橋知唔知自己講緊乜架？

楊岳橋扮唔識法律

其實楊岳橋話「貶損」一詞唔清晰，本身已經係一個謬誤。眾所如知，《國歌法》即使交上立法會，幾乎肯定要先過法案委員會一關；換而言之，所有參加法案委員會嘅議員，包括反對派議員，係有好大空間可以討論《國歌法》各條法例內容。若然楊岳橋覺得條法例真係唔清晰，唔緊要，加入法案委員會畀意見囉，佢係大律師嚟架嘛，唔係好應該就法例畀意見咩？

其實，就當「貶損」兩個字真係唔清晰都好，其實只要係法例嘅「釋義」部份講清楚咪得囉？香港好多法例都係咁架啦，囍雨唔係讀法律都知道可以咁做，況且條法例都仲未上到立法會，公民黨咁快反對做乜？咁擔心，咪去研究吓點樣喺「釋義」部份解釋清楚「貶損」呢個詞語囉；楊岳橋冇理由唔識，只不過係「為反而反」啫。

可參考法例不少

再退一萬步，就當「釋義」部份都冇解釋到「貶損」兩個字，香港係行普通法嘅地區，其實都有唔少法例、案例係值得參考；好似《國旗及區旗條例》或者《誹謗條例》等等，雖然兩條法例未必可以直接咁同《國歌法》比較，但當中一啲法律精神，包括點為之「貶損」、「侮辱」等等，其實都係可以通用嘅。身為大律師，法例內容都未睇，但就話「貶損」意思唔清晰、又話一定反對立法咁，根本就唔負責任，作為政客，表現令人非常失望。

講真吖，無論反對派講到幾擔憂都好，其實一切都只係藉口。大家唔好唔記得，就算最後有人涉嫌違反《國歌法》，到最後都係由司法獨立嘅香港法院去審理，個案落到香港法官手，法官一定係根據普通法法律原則辦事，好自然亦會就「貶損」兩個字作出司法解釋，楊岳橋連香港法官都侮辱埋，認真討厭到極致。其實，終審法院喺1999年一宗涉及《國旗及區旗條例》嘅裁決指出，「國旗是國家及國家主權的獨有象徵，代表國家的尊嚴、統一及領土完整，香港有合法權益保障國旗及區旗」；雖然當日所講嘅只係「國旗」，但我哋有理由相信，用同一套理念去理解《國歌法》，其實亦係合情合理，公民黨，好心唔好再多多藉口去幫人搵機會侮辱國歌啦！

圖片來源：RTHK