距離下屆立法會選舉仲有近兩年，到時邊個出選、邊個唔出選，以至到時係咩環境都仲係未知之數。不過，《生果報》似乎對2020年立法會換屆選舉好關心咁喇，喺佢哋訪問已經退出民主黨嘅大埔區議員區鎮樺嘅時候，亦不忘嚟一篇「拆局」文章，一邊話啲人退黨或對林卓廷選情有影響，一邊又引用番民主黨人士講法，講到佢哋嘅立法會議員林卓廷啲票好似天跌落嚟咁，少咗樁腳都唔駛驚。囍雨對於呢篇「拆局」文章有另一番解讀，就係下屆立法會選舉咁「遙遠」，而家《生果報》就幫人「預早告急」，好可能係佢哋以至民主黨都驚林卓廷政治前途喺2020年Say Goodbye先真！

有意參選 = 影響選情 = 鎅票？

囍雨睇完《生果報》篇〈新東票源重疊 或對林卓廷選情有影響〉，第一個感覺就係《生果報》講咁多嘢，其實唔係真係幫區鎮樺宣傳，而係想話畀人聽，一班民主黨新界東成員退黨、出去成立組織再參選，對林卓廷2020年嘅選情冇大影響；從字面睇，就係有人退黨未必影響到「非常出位」嘅林卓廷，但如果大家用逆向思維諗下件事，民主黨新界東一班人退黨，《生果報》就乜要煞有介事咁話畀人聽未必影響到「兩年之後」林卓廷喺立法會新界東選舉連任呢？係《生果報》驚林卓廷「落馬」，定係民主黨驚？定還是兩邊都驚，所以要同林卓廷嚟一個提早告急？

對於《生果報》呢一篇可能係史上最早同人「告急」嘅「拆局」文章，有心清眼亮嘅網民就話呢啲又係「鎅票論」、「內鬼」之說；諗諗下，囍雨又覺得呢個分析相當有道理，之前立法會九龍西補選，明明馮檢基紮根咗喺九龍西咁多年，仲只係要求公平初選不果而參選，一時畀人話鎅票，一時畀人話佢收左派錢，甚至質疑佢係同性戀。可以預計得到，如果有非盲反派主流嘅人將來喺新界東參選，「被變成」內鬼、被指為鎅票嘅機會都唔低呀！

又係果個卑劣嘅林卓廷

如果有留意《生果報》入面區鎮樺嘅訪問，佢話佢哋另組聯盟參選，憂慮有人會可能喺佢哋區議會選區「憾」佢哋，仲話相信一啲前黨友嘅做事作風，相信佢會「做得出」；囍雨想問下區鎮樺，佢係咪講緊果個人格卑劣、毫無政治道德嘅政棍林卓廷呀？