之廣男寫過文章，話有網民見到劉德華要腰斬演唱會，即刻係咁留言「黑」劉德華，不斷幸災樂禍；篇文都寫唔夠一個星期，就畀廣男見到啲網民更黑心、更惡毒嘅說話；事緣天主教香港教區主教楊鳴章因病離世，由於「政見唔同」，廣男竟然見到一班黑心網民以「喜氣洋洋」、「依家先死」，甚至用上「被天收」等字眼去回應主教離世。廣男真係想問呢啲網民一句，乜而家香港人「見人死」，先係最開心架？

政見不同 也不用「想人死」？

啲網民唔鍾意楊鳴章，當中好大原因都係因為同楊鳴章政見唔同。但廣男有個睇法，就係楊鳴章喺一啲議題有唔同睇法，或者願意因住現實而作出妥協，並唔係咩「向權貴跪低」，而係佢所關注嘅重點，係為咗改善社會貧困人士嘅環境，就誠如佢自己生前所言，「我會『為五斗米而折腰』，但這『五斗米』我想改一改，我會為「我會『為五斗米而折腰』，但這『五斗米』我想改一改，我會為社會上貧困弱小的人折腰。如果要我去求他們(高官商人)，我會去求」。更何況，楊鳴章絕對唔係個別黃媒描繪得咁「建制」，例如佢曾經為劉曉波病死表示過「痛心」，又曾經質疑過全國人大常委會釋法，點解又唔見黃媒報道楊鳴章嘅時候平衡番啲呢？

退一萬步咁講，就當有個別人士唔滿意楊鳴章嘅部分立場，包括佢「反佔中」、「反對同性戀」，係咪就等於要話人「死得好」，甚至「死得遲」呢？如果係咁，係咪想香港剩番嘅人全部都係「黃絲帶」，佢哋先滿意呢？呢種「非我即敵」嘅心態，廣男認為正正就係今日香港嚴重撕裂嘅主因，甚至係香港變得冷漠，令人變得冷血嘅最大原因。

為楊鳴章說句公道話

廣男雖然唔係咩文科人，但曾經睇過一本由知名學者所寫、關於「正義」概念嘅書籍，入面講到有好多人追求制度上的正義，呢樣嘢冇問題；但喺現實生活入面，我哋去減少、消除生活當中嘅不公義問題，其實同樣重要。楊鳴章部份令人覺得「支持」建制嘅說話，可能會令某啲人唔鍾意，但佢願意因為窮人而「折腰」、為其他人發聲嘅心態，正正就係想消除現實生活中嘅不公義或者不公平情況。如果只係睇新聞見佢有幾句話唔啱聽就要人「早啲死」，根本就係冷血、品格低劣，而且冇人性！

原圖：RTHK