中大亞太研究所尋日公布咗一項民調，顯示約有三分一受訪市民表示，如果有機會的，會打算移民或移居外地，結果同2017年9月另一相類調查相近。唔少盲反派中人睇到呢個民調結果，立刻好似如獲至寶咁，不斷上綱上線話中央政府介入香港內部事務呀、特區政府搞到香港冇「真普選」等等，講到似層層，係唔係真係咁架？囍雨睇清楚咁民調結果，明顯真係唔係咁喎！

港人想移民 因盲反派種下惡果

三份一受訪者想移民，聽落都真係幾值得憂心架，好彩個民調有問埋受訪者點解想移民啫，等其他香港市民了解到想移民一批人嘅諗法。是咁的，民調問到香港有乜嘢因素，令到有移民打算嘅受訪者想移民，前兩位分別係「香港太多政治爭拗/太煩/社會撕裂嚴重」（25.7%）、「香港居住環境擠迫」（25.7%），至於盲反派成日掛喺口邊嘅政制問題，其實只係排第三，即係17.4%嘅「香港政治不民主/不滿意香港政治制度」。

大家睇到啦，最多香港人唔滿意嘅，係「香港太多政治爭拗/太煩/社會撕裂嚴重」同「香港居住環境擠迫」，單係呢兩項加埋，已經51.4%！太多「政治爭拗」，一聽到呢個理由就知道，元凶肯定非「靠日日炒作政治議題搵食」嘅盲反派莫屬；遠嘅唔講，單係講以民主黨政客林卓廷為首嘅一班人，日日提住完全冇CASE可言嘅「UGL事件」，係都要老屈律政司徇私枉法、「放生」首特首梁振英，日炒夜炒嘈咗超過四年，但就一啲證據都拎唔出，你班人唔厭，香港市民都討厭你啦！

「違法佔領」乃社會撕裂的開端

仲有仲有，講到「社會撕裂」，責任就肯定非「違法佔領」一干人等莫屬啦。由於涉及「佔領九疑犯」嘅官司仲未完結，囍雨喺度就唔講咁多喇，但呢班人當日發起「違法佔領」時，信誓旦旦話一定會「俯首認罪、完善法治」，去到今日就全部走數，極力想打甩啲控罪，剩係呢一點，都已經足夠令香港市民對你班撕裂社會嘅凶手失望啦！

至於受訪者覺得香港「太煩」，囍雨其實都認同架，包括香港眾志黃之鋒等人，明明係為咗一己政治理念走去主動犯法，被法庭判坐監理應係「求仁得仁」吖，但呢班人對住鏡頭，就大大聲聲話自己係「政治犯」！大佬呀，香港法庭司法獨立，點可能有「政治犯」呀？為咗一己政治私利去誤導香港市民，大家話呢班人「煩」唔「煩」先？

盲反派反發展 令香港生活環境擠迫

另外，所謂「香港居住環境擠迫」呢一點，其實就仲簡單：囍雨只係問一句，到底係邊個陣營嘅人，不斷反對預計可提供1,700公頃土地、26至40萬個單位（當中7成為公營房屋）、供70至110萬人居住、創造34萬個就業職位嘅「明日大嶼願景」計劃？係囉，咪就係盲反派政黨同政客、咪就係以新界西自決派立法會議員朱凱迪為首，專門針對特區政府施政嘅社運人士同「港獨」份子囉！講到呢度，到底係邊班人令到香港人想移民？唔係仲要懷疑呀？

圖片來源：RTHK