學民思潮製作咗八萬張合理化「公民抗命」既宣傳單張，打算透過香港郵政發放，由於內容涉及鼓吹違法行動，香港郵政作為政府部門，當然就拒絕申請啦，重申只係按條例辦事，不存在政治考慮咁話。學民思潮班學生當然唔滿意呢個決定，其中一位領導人黎汶洛指狡辯話單張只係「解釋」公民抗命，唔係「鼓吹違法」喎。

通函規定講啲乜？

不如我哋先睇睇香港郵政既條款係乜先，根據「通函」既投寄條款及須知，「任何人不得投寄任何違法、淫褻、不道德、不雅、令人反感或帶永久形式誹謗的文字、圖片或其他東西」。香港郵政講到明，學民既單張裡面「有採取違法行動的意圖，包括公民抗命及不會向警方事先申請等，並且宣傳不打算根據《公安條例》作出通知的公眾集會」，所以拒絕咗學民既申請。

「公民抗命」就係違法，咁仲有得拗？

「公民抗命」就係要違法，相信連反對派都唔會有異議，頂多係爭辯出發點同用違法手式合唔合理啫；問心吖，如果唔係要宣傳「公民抗命」、唔係想人支持自己，咁又使乜寄出呢八萬個通函呀？講呢啲！

再講，如果好似黎汶洛咁講，只係解釋「公民抗命」，咁點解學民又唔將關於「公民抗命」既正反意見詳細列晒出嚟呢？講到咁偉大，列晒正反意見畀市民自己思考嘛，而家一面倒自說自話，單單列出支持違法抗命理既論述，咁仲唔係單向宣傳？學民仔，唔係學人玩語言藝術呀？好噁心囉！

咁都唔係宣傳？學民玩語言藝術

香港政局真係愈來愈癲，好似凡係「反政府」、「玩抗命」就係「正確」咁樣；學民仔既解釋，其實只要有少少Common Sense都知有問題啦，只要你唔係一個「政治立場指揮腦袋」既人，一定都睇出誰是誰非！都係嗰句，問心吖，咁都唔宣傳「違法」公民抗命？咪玩啦！

不過講真，查實學民仔今次已經贏晒，嘩，電台政論節目成朝用足一粒鐘去幫佢宣傳同插政府喎，學其中一位主持人話齋，贏晒啦，聽到傳單內容既唔只八萬個，仲唔使用八萬蚊寄通函添！所以話啫，學民仔認真勁、學民仔認真醒，配合埋香港某啲偏頗傳媒既免費宣傳，學民仔仲邊有得輸吖！贏晒啦、講晒啦！

原圖：網絡