元旦遊行當日，主辦單位「民陣」任由、縱容、安排「港獨」份子，喺事先已獲行政署批准，容許遊行隊伍使用嘅政府總部東翼前地嗰度「宣獨」，公然違反行政署嘅要求。政府事後發聲明譴責事件，批評有人手持「港獨」標語進入公民廣場，又指「民陣」未有按行政署要求，勸喻參加者唔好進行違反《基本法》嘅活動。唔跟規矩，「民陣」事後仲死撐，話行政署要求冇法理基礎，佢哋唔會阻止任何人發表政見喎；哈，查實「民陣」都幾好笑架喎，任何政府場地都有使用規定架啦，唔通「民陣」覺得借個場畀你用，你就可以胡作非為呀？唔好搞笑啦！

行政署事前已提出要求

話說，「民陣」嗰個發言人岑子杰，事後接受傳媒採訪時，確認的確收過行政署信件，裡面亦的確有提及，要求「民陣」勸喻參加者唔好進行違反《基本法》嘅活動。事件好明顯啦，就係「民陣」違反政府總部東翼前地嘅使用規定，完全唔尊重業主（即係特區政府）嘅意願，刻意容許一眾「港獨」份子喺政府物業裡面宣傳「港獨」，唔好意思，單係呢一點，囍雨認同行政署已經可以長期將「民陣」列入黑名單，唔畀佢哋再次借用政府總部東翼前地示威同集會。

「民陣」方面嘅解釋，老老實實，真係非常牽強；話行政署要求冇法理基礎，首先囍雨真心想問，點解「民陣」覺得政府就住自己物業訂立規矩係冇法理基礎呢？道理唔同你班人講，剩係同你班人講法理，高等法院喺早排嘅「政府總部東翼前地」司法覆核案裡面講到明，政府係可以就住政府物業訂立適合嘅規定，單係呢一點就足以證明，「民陣」說法完全站唔住腳啦！

政府有權訂立合理規矩

當然，囍雨亦唔想斷章取義，雖然高等法院係話政府可以訂立規矩，但相關規定就一定要合理，即係限制一定要合法同合乎比例；睇返行政署今次畀「民陣」嘅要求，其實只係要求作為借用人嘅「民陣」去「勸喻」參加者唔好進行違反《基本法》嘅活動，「勸喻」咋喎，點睇都冇可能係「唔合理」或者「唔合乎比例」啦，「民陣」咁都唔肯做，唯一解釋就係搵藉口去推搪，縱容、支持、聲援「港獨」。

事實擺在眼前，特區政府對於「民陣」同「港獨」份子嘅行為冇理由坐視不理，行政署必須研究清楚法理依據，必要時禁止「民陣」等「港獨」組織使用政府物業；「反港獨」，由始至終都係香港嘅政治同政制基礎，政府今次如何放生呢班人將來一定後患無窮，特區政府所有物業都可以被人利用作為「宣獨」場所！

圖片來源：RTHK