律政司司長鄭若驊日前休假回港後，即時向傳媒解釋自己唔起訴全國政協副主席梁振英嘅理由，同埋點解做決定之前冇尋求獨立法意見。一如既往，唔理政府官員點講，《生果報》呢份盲反派喉舌都唔會滿意架喇，不過唔滿意還唔滿意，批評都要有理據先得，誰不知《生果報》今次不單唔講道理，仲扮晒「拆局」咁搵個九流時事評論員兼學者分析鄭若驊解畫時嘅神態同語氣，從而得出「律政司不檢控梁振英，背後一定有政治原因」嘅結論；《生果報》講到冇野好講，連語氣都當做「實證」，咁都叫做「拆局」，你話係唔係笑死人吖。

表現自信 = 有政治原因？

話說《生果報》引述中大政治與行政學系高級講師兼評論員蔡子強所講，稱鄭若驊今次解畫「明顯地有自信，相信鄭是有備而來，尤其面對提問時表現得『好有力』」，又指鄭若驊「改變了律政司尋求獨立法意見的標準」、「不評論他人做法及稱別把法律問題政治化言論」等等，質疑律政司今次冇向梁振英提控背後喺有政治原因喎。老實講，蔡子強假假地都算得上係一個學者，當唔尋求獨立法律意見係一個質疑，乜人哋表現自信都有問題呀？呢個都係話人哋有政治原因嘅理由？會唔會牽強得濟先？「學者」喎！

如果根據蔡子強或者《生果報》嘅邏輯，咁以後啲官員講乜、表現成點都「好有問題」喎，表現有自信，就會畀人話「有備而來」、背後有政治原因；如果表現較冇自信，又可以畀你哋話「心虛」、心中有賊；如果表現正常呢，又可以話啲官表現正常反映事件不尋求。一句講晒，即係你哋講乜都得啦！係咪有咗政治立場，就可以連道理都唔講，捕風捉影就Okay先？

公我贏、字你輸的道理

講到底，《生果報》借評論、學者鬧鄭若驊，但完全無道理可言嘅攻擊手法，又係「公我贏，字你輸」嘅道理，即係啲官或者建制派點講嘢、咩語氣都有得鬧；引用一個講法，就算有人做好心扶個阿婆過路，只要《生果報》加上「竟然」兩個字，話呢個人「『竟然』扶個阿婆過馬路」，好事都可以變壞事。同理，原來官員表現有自信，都係有罪，真係令人「長知識」！而《生果報》呢篇所謂既拆局，根本就乜都冇拆到，只不過係捕風捉影，吹到UGL事件背後有重大陰謀咁，但邏輯充滿問題。反正都係玩到咁盡，廣男建議《生果報》見官員講嘢果時「眨下眼」，直頭話佢講大話啦！

原圖：《蘋果日報》截圖