年尾流流，本來想寫下開心嘢，不過見到林卓廷等政客仲死唔斷氣咁炒作「UGL事件」嘅時候，囍雨真係忍唔住要「爆」喇！林卓廷日前接受反對派喉舌媒體訪問時，批評特首林鄭月娥，話對方「死撐」律政司司長鄭若驊喺「UGL事件」上決定唔檢控全國政協副主席梁振英嘅決定，又質疑林太話鄭若驊決定「專業」亦未能服眾，仲話「專業」唔代表「公正」同「持平」喎。係囉，最「專業」炒作嘅，一定係你呢個政客啦！

專業就是有完整制度

林卓廷就係事實拗唔贏，就同你玩程序喇，日前接受反對派喉舌《生果報》嘅訪問，佢批評話，港府同建制派連日口徑一致，「死撐」鄭若驊的決定，又話林鄭月娥支持鄭若驊決定嘅回應，未能解釋點解律政司沒尋求獨立法律意見，仲質疑林太話鄭若驊專業就要人信咩？仲無啦拉埋港鐵嚟講，話港鐵夠專業喇，咪一樣出咁多問題，唔係話專業就代表所有決定係公正同持平等等。

其實林卓廷呀，你到底知唔知乜嘢叫做專業先？所謂專業，其實係講緊一整套完整嘅制度，由專業認證、專業守則、監察同懲處幾分面組成，各層環環相扣，缺人不可。以「UGL事件」嚟講，鄭若驊同律政司刑事檢控科裡面負責研究個案嘅職員，全部都有專業認證，佢哋根據專業守則（檢控守則）去就個案作出檢控與否、用咩檢控策略嘅決定，你林卓廷唔信咩？可以，不過唔該你提出具體理由，解釋點解律政司嘅決定係唔專業或者偏頗喇！其實你咁專業，又唔見你話搵到嘅「新資料」、「新證據」可以令廉署、NCA（英國打擊罪案調查局）查落去呢？

「審貪會」監察毋庸置疑

至於監察同懲處方面，喺「UGL事件」嚟講就更加嚴密喇；廉署調查完畢、律政司畀完法律意見，最終亦要由完全獨立、由社會賢達組成嘅審查貪污舉報諮詢委會員去審議，獲得委員會同意，廉署先可以結案。呢一個委員會就犀利喇，裡面由十三個獨立委員，全部都係社會知名人士，包括香港審計署前署長鄧國斌、獨立資深大律師甄孟義、財務匯報局主席黃天祐、香港城市大學秘書長（副校長級）林群聲教授、捷成集團主席捷成漢，以及民主黨創黨成員陳莊勤律師等等，連佢哋都同意廉署可以結案，唔通個監察制度就唔夠完善咩？

講到底，其實最唔專業嗰講，其實都係林卓廷。呢個咁嘅抽水政客，喺「UGL事件」曝光之初，成日屈梁振英係「收秘密回佣」，到後來自知「瀨嘢」，就絕口不提「回佣」二字，但從未收口或者道歉。仲有呀，大家唔知記唔記得，佢之前陪住自己個黨友林子健出嚟，高調咁指控內地執法部門「禁錮虐待」林子健，但事後係點，大家都好清楚啦，林子健涉嫌「報假案」，而林卓廷就即時閃人，提都唔肯提件事。講到呢度，到底邊個最「唔專業」，相信唔使多講啦。

圖片來源：大公報、林卓廷Facebook