每年年尾，幾乎都會有歌手喺紅館搞跨年演唱會，今年就輪到天皇巨星劉德華，但係好可惜，佢唱到上星期五（第14場）時，因為喉嚨發炎，要忍痛腰斬演唱會，並取消跟進三場演唱會，其後主辦單位宣布劉德華患上流感，醫生建議佢要全面休息，取消剩餘四場演出，即係前後七場演唱會被取消。一個歌手因為失聲要取消演唱會，本身已經係百般無奈嘅事，但令人更無奈嘅，係香港有一班mean到爆嘅網民，竟然攞劉德華嘅不幸嚟開玩笑，一時話叫人「專心搞填海」，一時叫人「收山」等等；如果幸災樂禍係香港人嘅「本色」，實在令人可悲！

不是粉絲也心痛

噚日廣男見屋企人喺網上面睇一段影住劉德華被迫腰斬個唱嘅片段，片段入面劉德華一邊忍住眼淚，一邊同班粉絲表示抱歉，最後忍痛唱埋隻〈如果有一天〉後就向觀眾鞠躬，黯然離開舞台。老實講，雖然廣男一直都唔係劉德華嘅粉絲，但睇到呢段長達約十分鐘嘅片段，亦都感覺非常心噏，唔明白點解有啲網民可以咁涼薄，仲攞人哋嘅不幸嚟開玩笑呢？劉德華患病，試問同「填海」有咩關係呢？劉德華係知名藝人，佢嘅努力同成就亦係有目共睹，你班人唔識欣賞，仲要叫人「收山」？呢啲係香港精神咩？

歌手開演唱會期間失聲，唔係第一次見過嘅事，廣男試過同家人喺特別日子買演唱會飛入場睇知名歌手演出，果名歌手失聲情況可以話係畀今次劉德華更嚴重，但一路都照唱落去，無諗過腰斬或者「回水」；對於呢種做法，大家可以話係堅持到底。但相比之下，力求完美嘅劉德華唔想將唔好嘅表現呈現於觀眾眼前，寧願冒住大損失都要腰斬演唱會，一力承擔責任，廣男只係諗到兩個字，就係尊敬！

意見不同 也可尊重！

劉德華一向被稱為「民間特首」，今次演唱會出問題咁多人「加把腳」，當中好大原因都係因為之前劉德華為一條影片配音表示支持填海，引起部份網民不滿。意見唔同，當然冇問題，但係咪有必要係咁「黑」人，咒到人哋「出事」先滿意呢？唔通香港真係已經變成一個人情「紙咁薄」嘅地方？誠如一位中肯地為劉德華發聲嘅市民所講，「無論你鍾意或討厭劉德華，要知道香港的天皇巨星已經買少見少了 ... 你可以唔贊同劉華嘅政治觀點，但係唔可以剝削佢對香港娛樂圈嘅貢獻。香港人好多怨恨，成日都想搵個人出氣。劉德華在香港的黃金時代陪伴我哋成長。希望佢身體健康！早日康復！」 

原圖：wenweipo