廉署、律政司表明唔會就「UGL事件」檢控梁振英，向來炒作開「UGL事件」嘅民主黨立法會議員林卓廷、尹兆堅可以話係醜態百出，前者為咗「隊」律政司連審查貪污舉報諮詢委員會都「暗踩」兩腳，企圖破壞廉政制度嘅形象，後者就為咗人格謀殺梁振英，連許仕仁案都攞嚟比較，不倫類比！今日，廣男上網，見到林、尹竟然就律政司唔檢控梁振英一事做「民意調查」，廣男第一個反應係，一單司法案件，民主黨用民調問人有咩觀感，係咪要用民意壓倒法治先？

民調代替證據？

噚日廣男已經講過，如果林卓廷可以用「消息」代替證據去攻訐律政司嘅話，咁其他人係咪又可以用「消息」話林卓廷指使林子健「自編自導自演」釘書釘事件呢？今日見林卓廷、尹兆堅搞民調，稱大部份人質疑律政司偏頗，廣男首先有一個問題，就係律政司作出一個司法決定，係咪適宜用「民意調查」去質疑呢？一單案件，唔係以法論法，而係用「市民意見」去判斷架？極端啲講，咁唔通市民想「濫告」，律政司就要「濫告」呀？傻的嗎？

廣男喺度又舉一個例，「UGL事件」被炒作咗四年幾，作為「投訴人」嘅林卓廷，多次公開指梁振英正接受廉署調查，懷疑觸犯咗防賄條例第30條入面有關披露受查人身份果部分；大家諗下，林卓廷疑似觸犯防賄條例，表證相當明顯，而且仲要重複地疑似「犯罪」，呢啲潛在案件，應該係交由廉政公署去調查，定係大家用民調去決定林卓廷有冇罪呀？稍為理性嘅人都知道，唔會用民調去質疑司法案件或者律政司啦！

黔驢技窮的政棍

林卓廷、尹兆堅之所以越玩越無理，廣男會用「黔驢技窮」去形容佢哋。律政司、廉署Close File係還咗梁振英一個清白，但對於靠炒作「UGL事件」上位嘅林卓廷以至尹兆堅嚟講（公允評論嚟架！），冇得炒作「UGL事件」，佢哋同唔到支持者交代，尤其係捐過錢畀佢哋嘅人！一班支持者捐錢畀林、尹，梗係想林、尹「屈死」梁振英啦，而家林、尹眾籌幫手還梁振英清白，如果廣男係有捐款畀林、尹嘅一份子，都唔知好嬲定好笑。

圖片來源：民主黨Facebook截圖