盲反派炒作「UGL事件」，基本上係咩歪理都講得出口，囍雨留意到，幾日前民陣出嚟公布「元旦大遊行」嘅主題時，社民連梁國雄（下稱長毛）聲稱梁振英「擺到明貪污」。囍雨相當好奇，一份董事局同意洽談、各方知悉嘅協議，何來「貪污」呢？見到長毛評論「UGL事件」，就令囍雨諗起佢當年收壹傳媒老闆黎智英錢無申報，又喺立法會幫壹傳媒講嘢，最後仲畀人告上法庭一事；老實講句，長毛案咁大嫌疑都冇事，擺明冇Case嘅「UGL事件」，又點可能違法呢？不如囍雨同大家「回帶」，「重溫」下長毛當年單案係咩一回事啦！

收錢唔申報 仲要幫金主發聲？

話說長毛喺2012至2016年擔任立法會議員期間，接受壹傳媒創辦人黎智英25萬元捐款，未有向立法會申報，被廉署控告佢一項公職人員行為失當罪。事實上，長毛除咗收錢之外，仲喺2014年1月果時，喺立法會辯論所謂「捍衛新聞自由」動議時，公然稱政府運用政治壓力迫使一啲商業機構唔敢喺黎智英嘅《蘋果日報》落廣告，令到該報收入大減等等。即係長毛有收錢（稱代社民連收）、無申報兼喺立法會幫「金主」發聲，當時嚟講罪嫌相當之大。

不過，法官最後都係判佢罪名不成立，因為控方未能夠喺毫無合理疑點嘅情況下證明果筆錢係畀長毛本人，而唔係長毛代社民連收捐款；法官特別提到，案件爭議點係黎智英畀社民連果25萬元嘅目的有冇改變，最後成為直接畀長毛嘅捐款。雖然判咗梁國雄無罪，但法官都講明張本票收款人原本係社民連，之後變咗係梁國雄，直言長毛行為並非冇可疑。

長毛仲好意思屈人？

老實講，長毛當時作為立法會議員，收金主錢（稱代社民連收）、唔申報仲要喺立法會幫金主講好說話，罪嫌咁大都冇事；如果佢係有足夠水平或者仲有啲政治道德，應該好清楚知道「UGL事件」係冇觸犯防賄條例，兼無利益衝突所以不可能構成公職人員行為失當。作為「過來人」，長毛仲好意思為咗政治攻訐、人格謀殺而老屈梁振英「貪污」？會唔會過份咗啲呀？ 

圖片來源：大公報