盲反派堅決炒作「UGL事件」，噚日喺立法會司法及法律事務委員會上，大力要求開特別會議邀請律政司司長鄭若驊上去交代「UGL事件」，其中民主黨嘅議員就非常落力地「發聲」。會議上有一個非常有趣嘅地方，就係涉嫌傷人、搶手機、違泊、偷電，而家有案在身嘅許智峯（下稱「癲鴿峯」），竟然好意思聲稱UGL事件「撼動香港法治和信心」。癲鴿峯作為立法會議員，但公然喺立法會強搶女政府人員手機，仲要係攞人手機入廁所「欣賞」，擺明破壞法治啦；而家面對擺明「無Case」嘅UGL案反而話係「撼動法治」，佢係咪講緊笑呀？

「癲鴿峯」其身不正

對於「癲鴿峯」呢番說話，囍雨覺得可以用兩個層次去睇；第一，UGL案件係咪有「撼動法治」呢？成件事其實好簡單，UGL案件經過廉署四年來全力追查，四年來不斷向審查貪污舉報諮詢委員會匯報，查完再將報告畀律政司考慮，律政司審視完證據後又將資料畀番審查貪污舉報諮詢委員會作全盤考慮先結案，過程嚴謹並且完全符合法治。癲鴿峯覺得事件「撼動法治」，但佢可唔可以提出證據呢？唔通佢好似佢黨友林卓廷咁，剩係「一味靠屈」呀？

第二個睇呢件事嘅層次，就係呢番說話出自「癲鴿峯」口，係咪特別諷刺呢？當佢講出呢番話，疑似為法治「發聲」嘅時候，但本人都其身不正，仲好意思話其他人？明明自己貴為立法會議員，竟然公然喺立法會強搶女政府人員手機，仲要攞入廁所「欣賞」，之後明明公開道歉完，轉個頭又想屈番女政府人員犯法或者行為不當，佢嘅行為破壞法治之餘，可以話係連基本道德都冇，而家仲無理話其他人或者案件「撼動法治」，佢係咪唔知醜字點寫呢？仲有仲有，「癲鴿峯」早排畀人踢爆疑似偷政府停車場嘅電去為自己部電動車「叉電」、再早一排又畀人影到佢「違泊」，呢種咁嘅代議士批評人「撼動法治」？唔係講笑呀？

民主黨在掙扎？

睇番UGL呢單嘢，林卓廷佢哋開頭搞「天下為公」、又眾籌聲言要跟進UGL事件的確係威係勢，但自從英國幾個執法部門都話唔會跟進UGL事件後，林卓廷等人已經被質疑眾籌還梁振英清白，而家連香港嘅執法、檢控部門都表明唔會檢控梁振英，民主黨由「贏家變輸家」，實在難怪佢哋亂晒籠，係咁喺度亂放箭嘅。不過，如果佢哋繼續唔識收，恐怕支持者會覺得佢哋無料到之外，分分鐘仲要「食官司」；好似林卓廷作為UGL事件舉報人，屢次向外聲稱梁振英正接受調查，疑似觸犯防賄條例入面唔可以披露受查人身份部分，唔知佢會唔會畀人拉呢？

圖片來源：文匯報