明明廉署、律政司已經就UGL案還咗梁振英一個清白，但盲反派班仲係要繼續老屈，當中尤以民主黨立法會議員林卓廷最為過份，除咗玩「有罪假定」，講到律政司唔檢控梁振英就好似代表「梁振英有罪」之外，更不惜連審查貪污舉報諮詢委員會嘅地位同功能都貶低。廣男今日睇新聞，又見到佢繼續大發謬論，一時話引述「消息」話廉署內部都質疑律政司決定，一時又話「據了解」審查貪污舉報諮詢委員會都詢問做咩唔向外尋求獨立法律意見。「消息」、「據了解」？咁林卓廷講呢啲嘢，有冇實質憑據？乜而家炒作到無嘢好講，林卓廷呢個人格卑劣、毫無政治道德嘅政棍要淪落到用「消息」去人格謀殺人咁可悲呀？難怪民主黨新界東支部咁多人因為唔妥佢而退黨啦！

消息？林卓廷講乜都得啦！

廣男覺得大家首先要明白一個概念，就係如果用「消息」指控他人而冇證據都可以當真嘅話，咁以後大家做嘢就唔駛講咩真憑實據！廣男舉一個例子，一個假設嘅例子，民主黨林子健之前疑「自編自導自演」釘書釘事件，稱自己畀內地人擄走，仲同民主黨一班大哥包括林卓廷出嚟開記者會將矛頭直指內地部門；廣男如果話有「消息」指呢件事嘅幕後主腦其實係林卓廷，咁樣代唔代表林卓廷係策劃「誤導警方案」嘅主腦呢？唔可以咁講嘛，要對人作出咁嚴重指控，一定要拎出實據，而唔係用所謂「消息」，即係話雖然林卓廷全程傍實林子健，但除非有實質證據講到林卓廷有參與其中，否則廣男或者其他人就算幾唔鍾意林卓廷、幾鄙視佢冇人格都好，都唔可以老屈佢架嘛！

故此，將以上例子套用番林卓廷以「消息」質疑律政司一事上面，林卓廷講嘅嘢，一樣係完全唔可靠，因為佢一句話有「消息」、「據了解」，基本上佢「講乜」都得啦！成件事最令人不齒嘅地方，係林卓廷要炒作UGL事件，已經唔係第一次咁做，之前又係引「消息」去話前廉署高層李寶蘭離職同「UGL事件」有關，講來講去都係拎唔出證據。講到底，林卓廷屈到無嘢好屈，就引用來歷不明嘅所謂「消息」去抹黑政敵，如果無恥呢個概念可以分為十級，林卓廷一定係「十級無恥」。

戳破盲反派的「語言偽術」

對於UGL事件，一份各方知悉、董事局同意嘅協議，根本無可能違法；同理，一份梁振英做特首前（果時仲被視為一定選唔到特首）所簽、講明唔可以有利益衝突嘅離職協議，亦都冇利益衝突。當盲反派不斷攻訐梁振英以至律政司，大家只要問一個問題就會知佢哋講真定講假，就係「你班政客講咁多嘢，但證據呢？」冇嘅，唔該你班人就收聲啦！

圖片來源：RTHK