「UGL事件」繼續成為林卓廷搏上鏡嘅藉口。噚日林卓廷佢哋開記者會繼續炒作事件時，不單繼續話律政司解釋唔夠詳細，廣男仲聽到林卓廷連「審查貪污舉報諮詢委員會」（方便地見，下稱「審貪會」）都「燒埋一份」，話人哋一般唔會質疑律政司判斷，暗示人哋唔駛點思考咁；但該委員會主席鄧國斌就明言廉署想盡辦法調查，該委員會亦係經過全盤考慮後認為毋須再調查；然下之意，即係無論係廉署、「審貪會」都好，冇「渣流灘」或者「放水」，林卓廷意有所指地暗示「審貪會」好似律政司講乜就乜嘅說法，真係唔知佢有咩憑據！

含蓄地貶低「審貪會」？

林卓廷以至佢黨友尹兆堅等盲反派人士，要繼續炒作UGL事件就梗架喇，因為佢哋向支持者眾籌咗二百幾萬話要「跟進」UGL事件，如果而家收檔，實畀支持鬧死。只不過，廣男估唔到林卓廷為咗玩政治攻訐，真係乜都講得出口；例如噚日林卓廷喺記者會度，被問到唔檢控梁振英嘅決定，其實係經過獨立運作嘅「審貪會」審視，入面亦都係法律界人士，林卓廷佢哋係咪連「審貪會」都要質疑，林卓廷就回應「審貪會」唔係佢哋嘅目標，不過就話啲有罪嫌嘅案件，通常都會交由律政司做判斷，而律政司做嘅判斷，一般「審貪會」都好少去質疑，因為大家分工唔同咁話。咁講法，係咪即係話「審貪會」唔駛認真審視案件，律政司話乜就乜呢？廣男覺得林卓廷真係講清楚好！

事實上，「審貪會」主席鄧國斌噚日面對記者嘅回應，仿如大巴大巴咁「車」咗落林卓廷塊面度。鄧國斌坦言，廉署喺2014年10月就UGL立案，每次都會喺「審貪會」會議上匯報該案嘅調查進度，廉署同事已經想盡辦法、千方百計，甚至可以用Leave no stone unturned（不遺餘力）來徹查事件，而「審貪會」上星期獲得廉署提交調查報告及律政司法律意見，亦都係經過全盤考慮認為毋須再調查。即係話，唔單止廉署喺UGL案出盡力調查，而「審貪會」亦都係非常認真、定期審視案件，最後憑證據、經全盤考慮地做決定，同林卓廷話講到「審貪會」會將有罪嫌案件交由律政司判斷然後好少質疑，呢種暗示人「角色少」的說法明顯有分別。

林卓廷，別再破壞法治、廉潔好嗎？

雖然林卓廷口口聲聲話自己冇理由質疑廉署同「審貪會」，而係質疑律政司，但係上述一番說話同分析，正正顯示佢質疑律政司嘅同時，根本都係喺度貶低埋廉署同「審貪會」；熟悉廉署運作嘅高人指出，曾經有案例，「審貪會」推翻廉署調查報告同律政司報告，需要重新調查，說明廉署同律政司唔能夠「自把自為」，如今「審貪會」同意結案，其實係很有力證明UGL事件根本無Case囉！

如貪污問題諮委會主席周松崗所指，香港廉潔聲譽建立多年，唔會唔控訴一個人，就唔係廉潔社會。而廣男就覺得，林卓廷等人卑劣、毫無政治道德嘅言行，則肯定係意圖破壞香港嘅法治、廉潔形象！

圖片來源：天下為公FACEBOOK影片截圖