近日有傳，本身屬於全國性法律嘅《國歌法》可能喺明年初就會提交立法會首讀，其中應該會特別指明，喺特首、行政會議成員、法官同立法會議員宣誓儀式前需要播放國歌。講真，呢個咁簡單同正常嘅要求，一般人冇理由反對吖，但偏偏香港有一種生物叫做反對派，呢班人事事為反而反，連宣誓前播國歌都要反，其中民主派會議召集人毛孟靜就話喎，咁樣做政治施壓、係要發出「一國」先行訊息，又話喺《國歌法》立法上應該「多一事不如少一事」等等，查實毛孟靜知唔知自己講緊乜、又知唔知自己做緊香港特別行政區嘅立法會議員架？

播放國歌何來施壓？

講清楚先，《國歌法》嘅完整內容，到呢一刻仍然未公布，即係話到底係唔係真係規定，喺特首、行政會議成員、法官同立法會議員宣誓儀式前需要播放國歌，呢個都未有定案。不過又咁，就算真係有上述規定又點呢？大家諗心一層，其實有乜問題先？喺特首、行政會議成員、法官同立法會議員宣誓前播國歌，因乜會好似毛孟靜咁講，係「政治施壓」呢？施咗乜嘢壓呢？點解作為中華人民共和國香港特別行政區立法會議員，宣誓前聽到國歌會有壓力呢？SORRY呀，真係點解都解唔通囉。

至於話上述安排係想發出「一國」先行訊息，唔好意思，毛孟靜你係唔係諗多咗呀？特首、行政會議成員、法官同立法會議員，都係香港整個政治架構裡面重要嘅一環，就出任呢啲職位嘅人喺宣誓嘅時候播放國歌，咁亦都合情合理喎。好心毛孟靜就唔好咁多心，無啦啦喺度「講先後」啦，一國同兩制係並行不悖，兩制前提固然係一國啦，但兩者冇矛盾架喎，如果毛孟靜連呢啲咁簡單嘅概念都搞唔掂，咁就不如唔好做立法會議員喇！

落實《國歌法》是香港責任

囍雨喺度要重申一次，《國歌法》之所以要立法，全因全國人大常委會決定將《國歌法》放入《基本法》附件三之中，令《國歌法》成為需要喺香港實行嘅全國性法律。換句話講，香港對於實行《國歌法》係責無旁貸嘅，特區政府亦冇權去SAY NO；係呢個前提下，既然特區政府選擇進行本地立法，而唔係直接公布內地版本嘅《國歌法》，咁香港立法會議員咪好好審議條法例，等佢合乎香港法院嘅普通法原則囉，何必好似毛孟靜咁，刻意滲入咁多政治元素呢？正常人，又何必懼怕國歌先？

圖片來源：RTHK