廉署、律政司發表聲明，講到明唔會因為「UGL事件」檢控全國政協副主席、前特首梁振英，即係話成件事Close File，梁振英係清清白白嘅。近期狂以「UGL事件」抽水嘅民主黨立法會議員林卓廷、尹兆堅雖然明知廉署已經還咗梁振英清白，但呢兩個向公眾籌晒錢嘅政棍，依然未收手，仲連同其他盲反派開記者會話要搞「守護廉潔法治遊行」喎，囍雨睇完呢個「記者會」，仲係講到梁振英好似「有罪」咁，一班聲稱要守護廉潔法治嘅人，玩「有罪假定」，似乎佢哋先係破壞緊香港嘅廉潔法治咩？

無罪講到「有罪」

老實講，囍雨覺得林卓廷喺個記者會度「好英」吓架，攞住律政司聲明，話得一張紙解釋點解唔起訴梁振英，太少喎，佢哋仲執住幾個字大玩語言偽術，話「無證據證明戴德梁行唔同意梁振英接受UGL款項」，就話「無唔同意」代唔代表「有同意」，戴德梁行「同意」、「知悉」又係咪等於批准喎？！律政司聲明已表明梁振英冇利益衝突、亦無須就成為特首前嘅離職協議申報，佢哋仲大大聲稱UGL協議有潛在利益衝突，仲攞性質完全唔同嘅許仕仁案嚟比較。不斷講到梁振英「犯罪」咁，囍雨剩係想問林卓廷一句，證據呢？乜香港嘅法治精神，由「無罪假定」變成「有罪假定」呀？你哋仲好意思搞「守護廉潔法治遊行」？點睇都似「『破壞』廉潔法治遊行」就真！

林、尹破壞廉潔法治

點解明知自己當正梁振英「有罪」係違反法治精神，林卓廷同尹兆堅仲要「死咬唔放」呢？囍雨就覺得主要原因有兩個。第一，同其他盲反派政客唔同，林卓廷、尹兆堅做晒大龍鳳，向支持者籌咗200幾萬元，聲稱用嚟繼續跟進「UGL事件」，如果錢用咗一部分，但「行動」要收檔，林、尹咪由本來喺支持者面前攞Credit，而家「火羅」咗，仲畀反對派自己友寸眾籌幫CY證明係清白，分分鐘仲會畀人告番佢哋誣告，所以無論政治上或為自己都要繼續屈、繼續人格謀殺梁英。

第二，「反梁」一向係盲反派嘅「大議題」，近年實在喺政策、民生議題冇咩大貢獻，人氣大跌，民主黨呢班人諗住執到支好簽，借UGL事件，「重振聲威」，點知律政司決定唔告、還梁振英清白，無咗個稻草人畀佢哋打，真係唔知點交代，所以將一切同官員有關嘅案件，梁錦松案、許仕仁案、曾蔭權案呀，都扯埋一齊攬炒，講到UGL案樣樣都咁，囍雨想講如果咁齊全，一早告咗啦！咪就係事實根本唔係咁囉！

不過，就算「政治上」林、尹幾「成功」都好，佢哋為咗攻訐、人格謀殺梁振英，將律政司乃至廉署等踐踏到「一文不值」，根本就係破壞緊香港嘅法治、公平同廉潔，佢哋仲好意思話自己遊行係為咗守護廉潔法治？真係唔知個「醜」字點寫！

原圖：Takungpao