尋日消委會同政府分別有報告，話奶粉又再缺貨，問題仲蔓延到去市區，更有個別零售商（藥房）抬價三成賣奶粉添。講真吖，到咗今日，相信除咗嗰份「為反而反」既民主大報社論，同埋嗰個聲稱代表商界既政黨外，都冇乜人會批評「限奶令」係劣政。

消委會尋日揭發，部份供應商補貨速度唔夠快，畀港爸港媽專用既訂貨熱線運作亦欠佳，一時接唔通、一時要顧客跨區拎貨。藥房呢？因為奇貨可居，商人竟然抬價，三成當然係個別例子啦，但貴過建議零售價就差唔多間間都係喎！大佬，搞得咁差，仲夠膽叫政府取消「限奶令」，係唔係傻咗呀？好心就自己做返好啲，拎多啲籌碼喺手先再講啦！

出現奶粉荒，相信人人都唔想（囤積居奇既商人例外），其實點解到咗今日奶粉供應仍然出問題呢？

有人就歸咎於內地水貨客太多，但事實係，水貨客中有「六成」係「香港人」，即係話，係香港人親自將奶粉送返大陸牟利。咁內地旅客呢？除咗「深圳戶籍居民一簽多行」嗰班外，斷估其他省市既旅客唔會老遠嚟到香港，最後帶兩罐奶粉返去啩？

當然啦，話完全同內地水貨客無關亦唔正確，囍雨覺得今朝電台有個聽眾就最公道，佢認為商界同港人自己責任都好大，香港水貨客帶奶粉返內地，甚至收錢代水貨集團排隊買奶粉固然係其中之一，個別供應商條供應鏈搞咗成年，到而家就係問題多多亦責無旁貸。個別熱門牌子至今仲成日缺貨，理由係乜先？

講乜都係假，囍雨認同，確保香港BB唔會斷奶係首要任務，畢竟大人唔食，BB都要食，所以政府一定要繼續嚴密監察事態發展，千祈唔好畀情況惡化，更重要既係，「限奶令」絕對唔可以撤，要撤，就撤咗聲稱代表商界、話限奶令影響自由經濟既政黨先！

原圖：網絡