民主黨立法會議員林卓廷同尹兆堅，幾個月前為咗炒作UGL事件，不惜搞咗個所謂「天下為公」嘅計劃，向公眾籌錢聲稱要追查UGL事件，但佢哋去英國告狀，英國唔同嘅執法部門都先後表示唔會跟進事件，因為根本就「無Case」，近日廉政公署同律政司都發聲明話唔會檢控梁振英，正式還咗梁振英一個清白。林卓廷一計不成，又生一計，話如果律政司唔公開所有文件或者到立法會詳細解釋，民主黨將會入稟高院，提出司法覆核咁話。點解林卓廷到今時今日仲要堅持炒作UGL？無他嘅，因為呢個連自己友都話「人格卑劣，毫無政治道德」嘅政客，為咗炒作UGL連籌錢都搞埋，如果而家「爛尾」，想收手都唔得！

林卓廷擺明死頂！

如果係一般盲反派政客，對於UGL事件結案，基本上出嚟對住記者批評下律政司或者提出一啲質疑，基本上都可以收工架喇，但林卓廷以至尹兆堅就唔得喇；因為佢哋為咗炒作UGL、人格謀殺梁振英，不惜搞個「天下為公」出嚟，向市民籌咗200幾萬元，用嚟請律師，又用嚟飛去外國搵外國執法機構，而家廉署Close File，如果林、尹同班支持者講佢哋要「收檔」，你估班支持者尤其是有捐錢班人，會唔會收貨呢？

林卓廷而家話考慮提出司法覆核，好明顯就係因為要向支持者交代，話畀人聽佢仲「做緊嘢」；不過，林卓廷咁做，可能仲有其他原因嘅，廣男有一個讀法律畢業又關心政治嘅朋友講，如果林卓廷提出司法覆核而法庭律政司司長出來解釋，咁無論司長講咩，林卓廷又可以炒作一番。如果司長唔出，咁佢又可以話司長「心有屎」、「放生」諸如此類，無論佢有冇Point，起碼都有繼續炒作事件嘅機會。

要炒作UGL事件到2020年

廣男就覺得，林卓廷肯定繼續炒作UGL事件，尤其係佢最近搞到民主黨新界東支部有幾十人退黨，如果佢地區又做唔掂，搞政治又搞到一鑊粥咁，佢下屆立法會選舉真係好難搞！所以，佢一定會繼續炒作UGL事件，既可轉移視線，仲可以盡量抽水，keep住人氣，話唔埋，等善忘嘅香港人忘記左UGL嘅來龍去脈，佢仲可以當自己「成功爭取」挑戰梁振英，挑戰律政司司長添。仲起碼要炒作到2020年立法會換屆選舉為止。廣男呢個分析，大家點睇呢？