「你卑鄙、無恥、下流、賤格」呢啲對白，通常只會係睇電視嘅時候聽到，估唔到喺政治圈子入面，有人退黨都會用類似嘅對白去鬧本來同屬一黨嘅政客。廣男講緊咩？咪就係頻頻傳出內訌嘅民主黨啦，就噚日之嘛，有59個民主黨黨員宣布退黨，當中58人來自新界東支部，其中柯耀林、丁仕元、區鎮樺以及劉其烽等人更加喺聯合聲明中，狠批該黨立法會議員林卓廷人格卑劣、態度專橫同毫無政治道德可言。廣男就喺度諗，林卓廷能夠激起咁多新界東人退黨兼鬧爆佢，睇嚟佢無論係人格以至人際關係，都相當有問題囉！

安插親信 打壓同儕？

咁多人唔妥林卓廷兼要退黨，真係事出必有因。睇新聞報道，好多今次「退黨保平安」嘅前民主黨成員，本身都同林卓廷都相當多牙齒印，有啲甚至可以話係畀林卓廷「恰到上心口」。好似身兼「將軍澳民生關注組」主席嘅柯耀林，就話林卓廷派「親信」莊榮輝空降到「將軍澳民生關注組」成員一直服務嘅區域，然後又派人去「將軍澳民生關注組」成員爭取連任區議員嘅區域，「人為製造撞區」，仲要迫佢喺民主黨同「將軍澳民生關注組」兩個牌頭之間揀一個，搞到佢被迫退黨。其他退黨人士例如北區區議員劉其烽，就話民主黨對北區嘅民生事務唔上心，仲話林卓廷作風霸道，對「同路人」趕盡殺絕添！

雖然林卓廷發聲明話啲退黨人士嘅指控嚴重失實，話「雙牌頭」問題係根據黨內機制共同決策，唔係佢個人決定。咁大家又要問下林卓廷，就算民主黨唔畀成員掛住兩個牌頭係共同決定，但啲撞區問題，以至安插自己友落區同「將軍澳民生關注組」成員「對陣」，係咪林卓廷自己製造先？唔好乜都賴落個黨度喎！仲有劉其烽話民主黨唔係好理北區嘅民生事務，林卓廷本人都係北區區議員，又係新界東立法會議員，可以話係民主黨喺北區以至新界東嘅區頭，佢對呢啲指控又點解釋呢？

一切都是因為林卓廷

有傳媒作出綜合報道，話一班退黨人士表示新界東支部發生嘅每件事嘅根源，都係因林卓廷而起。廣男就喺度諗，民主黨喺新界東咁多年嚟嘅根基，會唔會就咁毁喺林卓廷一個人手上呢？林卓廷對外成日搞事、抹黑政敵，對內又搞到咁多黨友退黨，睇嚟佢將來條政治路，都好難行下！