立法會議員林卓廷同尹兆堅因為涉嫌喺立法會審議一哋兩檢方案時阻礙正在執行職務嘅立法會人員而被捕，尹兆堅另外仲被控告普通襲擊罪。兩條友唔認罪、誘過於政府大家都預咗架喇，但尹兆堅喺法庭外面話政府檢控佢哋係「試水溫」、「以進一步箝制議會聲音」，廣男就覺得非常有問題喇；如果有立法會議員跟足議事規則、程序發表意見而被「打壓」，佢話自己聲音被「箝制」或者仲講得通，但如果有人係一心破壞議會運作，甚至過程令到其他人受傷，咁就係有人涉嫌違法，而唔係有人「箝制」佢哋囉！

林、尹顛倒是非

老實講，而家每次有盲反派人士被拉、被告，佢哋話自己無辜、被打壓可以話係「例行公事」，廣男都聽到冇乜感覺可言喇；不過，尹兆堅將今次案件講到係盲反派聲音被「箝制」咁款，廣男就覺得更唔合理。大家諗下，林卓廷、尹兆堅以至其他盲反派議員都好，當時佢哋不斷喺度叫囂影響議會運作，跟住立法會主席要趕佢哋出去尹兆堅仲想衝擊，過程中有保安受傷，先唔講林、尹係咪有罪，但成單嘢擺明就唔係有人要「箝制」佢哋聲音，而係有人自招惡果。

用另一個角度諗，如果盲反派議員跟足議事規則、程序發言，但發言畀人無理打壓或者禁止，咁嘅情況下話佢哋聲音畀人「箝制」可能仲講得通，但事實唔係咁嘛！廣男覺得成件事好簡單，喺審議一地兩檢方案嘅較後階段，由於盲反派已經拉唔到布，要阻止一地兩檢方案通過，唯一方法就係搗亂議會，試圖搞到會議終止，咁佢哋就可以向支持者交代，話自己盡力阻止一地兩檢方案通過；但而家一地兩檢方案通過咗，林卓廷、尹兆堅又搞到自己畀人告，可以話係「賠了夫人又折兵」

賊佬試沙煲

其實林、尹以至盲反派喺議會搗亂，就好似「賊佬試沙煲」咁，試下喺議事廳叫囂，又試下玩衝擊，如果無事咪繼續做，將搗亂、衝擊當成係「日常議會抗爭」手段囉；到警方、檢控部門執正嚟做告佢哋果時，呢班「賊佬」以後就算仲敢喺議事廳搞事，都未必敢咁猖獗。廣男只能夠講句，法例一早存在，佢哋身為立法會議員都涉嫌以身試法，而家畀人告又點可以怪其他人呢？ 

圖片來源：RTHK