被稱為「世上最高權力的人」嘅美國總統特朗普，行為處事一向極之霸道，除咗用人唯親、「誅殺」異己外，最為人詬病嘅，肯定係佢經常嘗試干預針對自己嘅刑事調查，上任後即時扭盡六壬，務求從「通俄門」調查中甩身。最近，有44名美國前國會參議員聯署喺《華盛頓郵報》撰文，指現任國會參議員有義務捍衛美國法治、憲法、政府架構同國家安全，文中又提到「通俄門」調查進入尾聲，擔心國會共和黨人盲目支持特朗普等等。做總統做到咁肉酸，完全違反晒民主同公義原則，特朗普有幾不得民心，從呢篇文章中已經可知一、二。

特朗普多次嘗試介入刑事調查

講真，呢班前參議員嘅擔心真係不無道理。大家唔善忘的話，為咗拆掂「通俄門」呢單嘢，特朗普上任以來已經使咗非常多橫手；遠嘅包括炒咗原任美國聯邦調查局局長嘅科米，白宮喺科米被炒後發布聲明，聲稱炒科米將有助結束同俄羅斯有關嘅調查。嘩，真係好強勢呀，講到明唔想科米插手「通俄門」事件，所以先下手為強炒咗對方喎；係囉，炒晒啲調查人員咪冇人查自己囉，特朗普真係好叻仔呀！（曲線）

除咗科米之外，當然唔可以唔提美國前司法部門塞申斯啦！塞申斯係特朗普任內第一位司法部長，已佢之所以「被辭職」，唯一理由就係堅持迴避介入「通俄門」調查，特朗普質疑對呢個避嫌嘅做法抱有好大意見，仲講到明如果委任你做司法部長，但你事事玩避嫌的話，咁不如唔使你做啦，搵其他肯介入「通俄門」調查嘅人去做內閣官員咪得囉！

美國人會以選票懲罰特朗普嗎？

真係唔好意思，囍雨忍唔住又要「嘩」一聲，特朗普呢種理論真係政治、法治新解釋，呢種完全反智嘅言論，竟然出自一個「民主大國」嘅元首，試問又點可以令人唔震驚先？單從上述兩個例子已經可以見到，嗰班聯署撰文嘅前參議員真係有理由擔心自己祖國架，特朗著完全不避嫌咁嘗試介入「通俄門」調查，試問真心愛美國嘅政客又點可能唔擔心呢？

雖然囍雨唔係美國人，但講真，美國作為世界第一霸權，世界各地都見到美國嘅手影，囍雨又點可能唔擔心吖。不過，美國由邊個做總統，始終都係美國本土嘅問題，囍雨只係希望美國民眾打開心窗，認真睇清楚特朗普嘅言行係唔係真係對美國有利，正如嗰名被炒嘅FBI前局長科米講，希望美國人真係可以喺2020年換屆選舉時做出明智抉擇，舉國一心咁「VOTE DONALD OUT」啦！