近年無論有咩基建項目上馬，盲反派議員基本上都會出力反對，但可笑嘅係，呢班政客成日都一邊反對政府基建、一邊又要帶啲街坊去用呢啲基建，實行喺議會一邊反對，但去到地區就用行動證明自己有幾「支持」政府。近日，有傳媒就揭發民主黨又搞團帶街坊經港珠澳大橋返內地玩，宣傳品仲用「海上巨龍、世紀工程」嚟形容大橋，準確咁將大橋形客得好偉大，但明顯就同個黨平時喺議會嘅評論完全唔同；廣男喺度諗，喺議會、傳媒面前就乜都「盲反」，返到社區用呢啲基建設施嚟吸引街坊支持，民主黨實在太無恥，亦都太「屈機」喇！

宣傳品將民主黨Logo縮細？

據傳媒報道，近日有讀者發現，民主黨荃灣社區顧問黃湛聯喺宣傳中山、珠海兩天遊嘅海報上，將港珠澳大橋形容為「海上巨龍」、「世紀工程」，除咗講明會經港珠澳大橋去珠海，宣傳品上面更寫住「福來邨居民聯會」同「荃灣康樂會」等；最有趣嘅係，喺黃湛聯張大頭相隔離，有一個極度唔顯眼嘅「民主黨標誌」，點解黃湛聯身為民主黨人，嚟緊亦疑似要參選，但喺港珠澳大橋旅行團就太敢用民主黨標誌呢？民主黨幾時變得咁「低調」呀？

事實上，上個月民主黨沙田區議員吳錦雄搞旅行團，同樣標榜一次過去晒兩個基建，結果畀建制派批評「身體最誠實」，吳錦雄當時接受訪問就話，黨內都有提醒過應該「低調處理」，好似搵居民協會主辦活動咁；廣男就喺度諗，係咪因為之前已經有黨友高調搞基建團畀人恥笑，所以黃湛聯搞港珠澳團，都要將民主黨個標誌盡量縮細，實行「政治要低調，哄街坊就要高調」呢？如果係咁，點解又唔索性直頭連民主黨標誌都唔出？唯一諗到啲原因，就係民主黨知道自己近年喪反政府基建，所以唔好意思畀啲黨員咁高調搞基建團！

民主黨用行動 撐基建

對於民主黨呢種「口裡說不，身體卻很誠實」嘅行為，如果用負面角度睇大家當然可以批評佢哋口裡不一啦；但用樂觀啲角度睇，其實民主黨嘅行為話畀大家聽，其實佢哋係非常支持政府基建，如果唔係民主黨立法會議員黃碧雲，之前就唔會好開心咁喺大橋度笑晒口影相啦！其實撐政府基建係好平常嘅事，廣男覺得民主黨議員喺立法會都應該「勇敢」啲，話畀大家聽，自己同支持自己嘅街坊其實都好撐政府基建，唔好喺度遮遮掩掩，下下都盲反啦！

圖片來源：由讀者提供