民主黨立法會議員林卓廷同尹兆堅因為涉嫌喺今年6月立法會審議一地兩檢草案時妨礙立法會人員執行職務而被警方預約拘捕，其中尹兆堅更被加控一項普通襲擊罪，尹兆堅話自己對指控「莫名奇妙」，林卓廷就話政府以「莫須有」罪名起訴議員；公民黨黨魁楊岳橋質疑議會係咪要「班房化」，只要離開坐位就會畀人刑事檢控，講到「好少事」咁。林卓廷、尹兆堅、楊岳橋根本就係混淆視聽，最緊要喺佢地這邊廂話自己「和平」同用「合適」方法表達意見，另一邊廂，電視重溫當日衝擊畫面。見佢地非常「勇猛」衝主席台，真係當香港市民傻的嗎？

衝擊、保安受傷 是和平？

事發當日，盲反派議員喺坐位企喺度，又高叫口號、同官員「疊住聲」咁發言，於是立法會主席梁君彥決定將林卓廷逐出會議廳，林卓廷嘅黨友尹兆堅衝上主席台理論，同樣被逐出議廳，由保安抬離場而引發混亂，過程當中仲令到兩名保安受傷，其中一人更加因為肋骨感到痛楚要送院，立法會秘書處當日就事件報警。綜觀成件事，撇除林、尹二人係咪真係「有罪」，但成件事一定唔係楊岳橋所講「離開坐位」咁簡單。

問題嘅重點，係在於林、尹二人破壞議會秩序，當中尹兆堅更涉嫌傷人；楊岳橋將事件講到輕描淡寫，係佢覺得衝擊（主要係尹兆堅）根本唔係咩一回事，定係就算有保安因為執行職務而受傷都係不值一哂，又係一副盲反派議員大晒嘅咀臉呢？楊岳橋唔好唔記得，佢自己除咗係議員仲係一個大律師，有人涉嫌犯法，警方就要執法，唔可能為有人因為自己係議員就有特權！

議事規則要再修訂？

今次盲反派議員衝擊、被捕一事，亦都再次反映咗立法會係咪有需要再修訂議員規則嘅問題；囍雨就覺得，而家盲反派議員搞破壞、癱瘓議會基本上係「零成本」，甚至已經成為佢哋嘅「另類拉布」手段，如果議會任由盲反派繼續用衝擊方式搞事，最終民生議案等通過唔到，受害嘅始終都係市民。所以為咗議會以至社會嘅福祉，建制派議員實在有需要諗下係咪要進一步修改議事規則，唔好畀盲反派無日無之咁破壞議會運作！