泛民接連兩次喺立法會補選輸畀建制派，事後仍不知自省，不停搵代罪羔羊，一時怪選民「心淡」、一時怪本土派唔投票，認真好笑。近日，盛傳想代表泛民參加新東補選嘅「長毛」梁國雄嚟料，公然向「本土派文痞」開火，仲反問人哋係唔係覺得泛民金主、壹傳媒老闆肥佬黎控制泛民嘅政治主張添；「長毛」，你今次就唔啱喇，肥佬黎控制泛民政治主張就係人都知啦，你自己都收過對方錢，扮乜嘢喎！？

「長毛」否認肥佬黎係泛民金主？

話說，「長毛」有一日喺自己個網台節目上面反擊《生果報》嘅主筆李怡，首先批評對方言行不一、雙重標準，又反駁指本土派鬧泛民收肥佬黎啲錢、係泛民金主，反問一向支持本土派嘅李怡係咪認同肥佬黎控制成個泛民嘅政治主張等等。老老實實，囍雨當然唔會知李怡點回應啦，只不過長毛言論中有一點其實非常明確，就係肥佬黎的確係泛民金主呢一點喇！

肥佬黎多次捐款贊助泛民

嗱，而家就等囍雨根據已知事實，同大家FACT CHECK一下到底泛民肯定收咗肥佬黎幾多錢啦。首先係「長毛」，佢幾年前透過當時肥佬黎嘅「左右手」Mark Herman Simon收取肥佬黎一筆25萬港元嘅政治獻金，事後亦冇向立法會申報（冇話佢犯法呀！）；另外，工黨李卓人同公民黨梁家傑同樣係透過Mark Herman Simon，分別收取肥佬黎提供嘅150萬港元同30萬港元政治獻金。

再講遠少少，2011年10月，有多份報章報道，肥佬黎捐款畀香港泛民主派同宗教界人士，檔案顯示佢由2006年到2010年，分別捐款畀民主黨同公民黨各1,000萬以上，同時亦將2,000萬捐畀天主教香港教區榮休主教陳日君。據統計，單係2009年，肥佬黎嘅捐款就佔民主黨非會員捐款99%、佔公民黨68.2%。

肥佬黎同泛民好啱KEY

確立咗肥佬黎係泛民金主呢個事實之後，咁大家就會問，到底肥佬黎控制成個泛民嘅政治主張呢？控唔控制就唔知，只係知道肥佬黎同泛民真係好啱KEY，每當香港有政治大事發生，肥佬黎都會CALL晒班泛民元老去佢屋企「聚會」，而咁啱得咁橋喎，次次聚會完之後，班泛民元老就會統一口徑，立場成日都會變得好一致咁。由於例子真係太多，囍雨唔喺度講喇，大家上網自己打「肥佬黎」、「大宅」、「密會」等等就可以搵唔大量相關報道。講到底，要市民信泛民冇受肥佬黎影響，真係好難囉！唉，「長毛」，你與其繼續喺度吹水講大話掩飾，不如切實檢討自己係唔係需要檢討同反省，否則一定會畀選民唾棄囉！

原圖：大公報