嘩，真係一百歲仲在生，都仍然有新聞聽！講緊嘅當然係「當今世界唯一超級大國」美國啦！話說自從現任總統特朗普上任以來，美國已經先後退出多個國際條約，美其名就係要「自立自主」（美國有幾唔自主？唔好玩啦！），實則就係唔想盡國際責任，大玩單邊主義。近日，美國國務卿蓬佩奧竟然仲夠膽為主子嘅外交政策辯護，話美國退出多個國際條約，只係希望推動國際組織改革，以免某啲國家濫用呢啲組織嘅規則從中得益。推動改革？乜咁偉大呀？可惜明眼人都知道，你哋講緊大話囉！

排放大國退氣候協定

嗱，多嘅就唔講喇，囍雨喺度不妨點出其中兩條特朗普上任後即將，或者已經退出咗嘅國際條約，等大家自行判斷誰是誰非。第一條要講嘅，當然係特朗普上任冇幾耐即時宣佈退出嘅《巴黎氣候協定》！美國作為世界上數一數二嘅溫室氣體排放國，全球暖化佢有份造成架，但特朗普上任冇幾耐，即係舊年就決定退出，理由係話協定對美國代價太大及非常不公平喎！

唔止咁喎，本來根據協議規定，整個退出程序需要四年時間，不過特朗普當時就表明美國會「即時停止」履行協定承諾，又話會嘗試同各國展開談判，爭取更公平協議。咁特朗普口中所講嘅「非常不公平」係咩意思呀？原來佢引述一個研究，話協定會令美國喺2025年前損失270萬個職位，退出協定係兌現佢「美國工人優先」嘅競選承諾！大家睇到啦，美國退出《巴黎氣候協定》，單純只係為咗政治同經濟理由，關咩推動改革事呢？唔該蓬佩奧節省少少啦！

單方面退伊朗核協議

講完《巴黎氣候協定》，而家輪到《伊朗核協議》。《伊朗核協議》係乜東東呢？呢個係前任美國總統奧巴馬任內，連同英、德、法、俄、中五個國家，一共耗時廿一個月先至成功同伊朗達成嘅協議，透過減緩經濟制裁，換取伊朗約束自己嘅核計劃。自從特朗普今年五月宣布退出協議後，美國同伊朗關係轉趨緊張，美國今年十一月起全面恢復制裁伊朗，包括禁止貿易夥伴入口伊朗石油。

好喇，問題嚟喇，「禁止貿易夥伴入口伊朗石油」，咁到底邊個有著數呀？唉，講到明就老土啦，咪就係美國喺中東嘅「盟友」兼金主沙地阿拉伯囉！沙地同伊朗一向有牙齒印，伊朗出口唔到石油，世界油價波動，當然唔係好事，沙地有見及此，於是二話不說，喺今年七月就宣布，必要時可動用後備石油，增加石油產量，配合其他國家需要喎。

包庇沙地令人髮指

沙地增加產量，錢就未必賺到好多，但國際地位就唔同咁講法啦，大家試諗吓，當人人都要靠沙地去穩定國際油價，沙地又點會唔威威呢？大家見到早排沙地王儲擺明指揮手下去謀殺記者，事後各國都唔敢輕舉妄動對付，咁就知沙地而家喺美國包庇下幾咁作威作福啦。

講到底，美國退出多個國際協議同條約，最終咪又係為咗私利同利益，蓬佩奧公開講大話，吹到美國點好點好冇用喎，唔肯盡國際責任、一味死守住單邊主義玩「一言堂」，最終一定會受到全世界唾棄。美國？今時今日已經係「霸道」嘅代名詞啦！

圖片來源：新華社（資料圖片）