國家憲法同香港《基本法》有衝突？國家憲法唔適用於香港？呢啲咁反智嘅言論，竟然出自公民黨法律界立法會議員郭榮鏗把口，真係聽到都心驚。話說尋日香港基本法委員會主任沈春耀喺一個活動上致辭，其中提到國家憲法係國家嘅「根本法」、「最高法」，香港作為中國嘅特別行政區，冇可能自外於國家憲法；對於沈主任嘅說法，郭榮鏗立刻反射式批評，話《基本法》裡面講明唔實行社會主義，唔認同國家憲法點樣喺香港執行。唉，其實郭榮鏗有冇聽到沈主任原話講咩架？郭榮鏗嘅片面批評，明顯係為鬧而鬧，完全唔切合佢法律界代表嘅身份囉！

國家憲法若不適用 《基本法》即失效

其實沈主任成篇演辭嘅目的，單純係想帶出，國家允許香港實行「一國兩制」，而「一國」正正係「兩制」嘅前提同基礎；所以，「一國兩制」喺國家法治上嘅最高體現就係國家憲法。眾所周知，香港之所以可以實行「一國兩制」，全因為國家憲法授權咁做，並且藉由全國人大通過嘅《基本法》去賦予法律基礎，套用沈主任嘅說法，國家憲法係「母法」，而《基本法》就係「子法」，認識咗呢種關係之後，大家自然會明，如果國家憲法喺香港係唔適用的話，咁《基本法》亦會失去效力，郭榮鏗到底明唔明呢種咁明確嘅關係先？

仲有仲有，沈主任絕對「冇提到」，國家憲法每一條都可以喺香港具體執行，佢只係想解釋，如果以為香港只係需要理會《基本法》，而唔需要理會國家憲法嘅存在的話，咁就真係大錯特錯。事實上，香港唔係一個獨立主權國家，對香港而言係「唔會有」一部所謂單獨屬於自己嘅「憲法」，國家為咗令到香港實行「一國兩制」時有法理依據，於是當年就制訂《基本法》，而香港法律體系亦以《基本法》會最高原則。不過，都係同一句，對於香港呢一個中國嘅特區而言，憲法只有一部，就係國家憲法。

郭榮鏗「政治凌駕專業」又一顯例

老實講，囍雨唔相信郭榮鏗唔明沈主任講緊乜，只不過因為某啲政治理由，令到佢唔可以客觀咁用自己專業去分析同回應啫！話國家憲法喺香港唔適用，如果呢種說法成立，真係唔想香港有「一國兩制」，亦唔想《基本法》裡面對香港人嘅保障繼續落實。郭榮鏗為反而反，但言談間連自己口裡面最珍惜嘅「一國兩制」權利都想放棄，證明佢早已經被「政治凌駕專業」，咁仲係咪適合繼續做立法會法律界代表呢？

圖片來源：香港電台即時新聞