作為曾經嘅香港第一大黨，民主黨本身都不時發生內鬥。除咗歷史上已經發生過嘅兩次大型退黨風波，呢個黃昏政黨近日又爆內訌喇！據講，民主黨新界東支部不久將來會有包括多名現任區議員在內嘅五十名黨員一次過退黨，而導火線正正係因為呢班黨員，一早都已經非常唔妥已經喺民主黨新界東支部話晒事嘅現任立法會議員林卓廷，昔日同路人變成今日要割席，據講犯眾憎嘅林卓廷就係最大元凶！

明爭暗鬥 各不相讓

話說，今次退出民主黨嘅黨員包括大埔區議員區鎮樺、剛卸任民主黨副主席嘅沙田區議員李永成、沙田區議員丁仕元、前主席劉慧卿嫡系「將軍澳民生關注組」主席柯耀林等50人，最快下星期就會召開記者會宣布有關決定。

至今民主黨今次退黨潮嘅導火線之一，原來係林卓廷想安插自己友，即係喺中西區敗選多次嘅莊榮輝「空降」落去將軍澳都善選區「插旗」，但查實呢個區本身已經有同屬反對派嘅「將軍澳民生關注組」成員李栢棠喺度；講開「將軍澳民生關注組」就勁喇，因為柯耀林本身就係呢個組嘅主席，林卓廷等人為咗令到柯耀林就範，竟然喺中委會將「將軍澳民生關注組」定性為政治團體，要求柯耀林關注組同民主黨之間二選一，據講柯耀林忠義兩難全下，決定退出民主黨，繼續力撐李栢棠同莊榮輝對撼。

誅殺黨友 刀刀見骨

睇到呢度，廣男真心非常好奇，事關「將軍澳民生關注組」成立咗超過十年，唔少民主黨區議員亦係身兼兩重身份，因為過去十幾年唔去理會、唔將人哋定性為政治團體，偏偏喺林卓廷要安插好朋友莊榮輝「空降」時，就要黨員兩選一呢？係囉，咪就係「對人唔對事」囉！為咗鋪條好路畀自己友，連有超過十年感情嘅黨友都要放棄，呢個咪民主黨新界東領導層嘅作風囉，明白晒！

民主黨經過今次大清洗，相信林卓廷嘅地位一定更加穩固，佢2020年繼續代表民主黨參加立法會選舉，講真就冇乜懸念可言架喇。之不過咁，各位新界東選民，大家真係張開雙眼睇睇民主黨新界東支部嘅作風，而家只係區議會選舉，佢哋已經殺到刀刀見骨，連自己人都唔放過，乜大家覺得佢哋真係具備民主素養咩？「搶議席，為搵食」，林卓廷等人做緊乜，各位市民咪自己研究吓囉。

圖片來源：大公報