「自決派」立法會議員朱凱迪嘅村代表選舉提名無效，聲稱反對「港獨」但同時支持人哋「和平推動港獨」嘅佢，堅持自己提名無效，係因為選舉主任「搬龍門」所致。曾經講過，認同「港獨」係香港前途選項之一嘅佢，疑似由參加村代表選舉嘅一刻起，已開始掩飾自己「唔會真誠擁護」《基本法》嘅事實。開口埋口話「搬龍門」，但其實稍為有留意事態發展嘅人都睇得出，最搬龍門嗰個係佢自己先真！等囍雨再次踢爆呢個「暗獨」政客嘅真面目啦！

「上次得咗，下次一定要得」？

講親村代表選舉，朱凱迪都好喜歡搬出一套「之前冇事，今日亦唔應該有事」嘅歪理出嚟。佢話，自己自決嘅立場，2016年得到立法會選舉主任確認、就任宣誓時又得到立法會秘書確認，而喺人大常委會解釋《基本法》第104條後亦冇受到政府司法覆核挑戰，但係同樣立場，今日就成為咗被DQ村代表嘅理據，認為政府係「搬龍門」，以「政治審查」去DQ佢。.

枉朱凱迪係「立法會票王」，呢啲咁違反常識嘅言論竟然出自佢把口，繼續意圖誤導香港人，而家就等囍雨KO你啦！查實「擁護《基本法》」係香港各級選舉嘅共同要求，每次報名參選，參選人就要簽一次聲明，負責嘅選舉主任亦會就住「嗰一次」聲明去判斷簽署人係唔係「真誠擁護《基本法》」。如果朱凱迪所講成立的話，唔通所有爭取連任嘅立法會議員，下次參選時就唔需要簽擁護《基本法》聲明喇喎？「上次得咗，下次一定要得」，呢個係乜嘢邏輯？

畀足機會解釋 自行放棄與人無尤

再者，2016年立法會選舉，同今次村代表選舉，兩者足足相差兩年。兩年時間，一個人嘅立場唔可以改變架？村代表選舉主任根據最新蒐集得來嘅資料，判斷參選人係唔係合乎參選資格，根本就係法定程序。就當退一萬步，上次立法會選舉真係睇漏眼放咗你入閘都好，呢個亦唔代表今次村代表選舉選舉主任DQ你係「做錯」。更重要係，畀晒機會你交代，你都唔肯正面回答，究竟今日你「係唔係提倡或支持『香港獨立』係自決前途嘅選項」吖嘛！

至於朱凱迪另一個「搬龍門」位，其實就更加離譜，佢話喎，如果自己被視為政府眼中釘，或者對方有政治目的，無論點回答選舉主任問題，其實都唔會有分別。朱凱迪呢個說法要成立，前提係佢有答問題先！但而家情況唔係咁喎，選舉主任連問佢兩次，到底佢口中嘅「自決」包唔包括「港獨」選項，兩次朱凱迪都唔肯正面回答，一時又推測選舉主任連「支持人哋和平推動港獨」都唔畀、一時又質疑選舉主任「冇咁嘅權力」，顧左右而言他。唔肯直面答問題，而家又話點答都冇用，朱凱迪玩晒啦！

盲反派無視香港法例要求

朱凱迪同盲反派班政客，一直將選舉主任DQ嘅決定批評為「政治審查」，但佢哋一係唔提法例有咁嘅要求、一係就曲解法例，話即使本港法例寫到明，但選舉主任仍然冇權去判斷參選人係唔係真誠擁護《基本法》；種種反智嘅言論出自呢班所謂民意代表嘅口，除咗聽到市民「眼都凸埋」，其實更令人擔心，到底呢班人當中，有幾多個其實係「暗獨」嘅呢？

圖片來源：RTHK