工黨李卓人喺立法會九龍西補選中敗選，泛民主派口裡就話會反省檢討，實質就繼續搵代罪羔羊。繼李卓人本人先「賴」畀對手馮檢基「鎅票」、後「賴」選民「心淡」唔出嚟投票後，公民黨元老、資深大律師余若薇又嚟料，不過今次余若薇冇再「賴」選民，但就反過來「賴」同屬反對派嘅區議員鄺葆賢冇落力拉票，結果當然係激到鄺葆賢紮紮跳啦。查實好似李卓人同余若薇等舊電池，一敗選就立刻搵藉口開脫，連少少自省勇氣都冇，仲學乜嘢人講民主吖！

余若薇屈人冇盡力拉票

話說，余若薇日前突然喺網台節目度點晒名開火，話如果「青年新政」前成員、黃埔西區議員鄺葆賢醫生願「落力支持」李卓人，相信選舉結果會有唔同。鄺葆賢尋晚喺自己社交網站不點名反駁余若薇，重申「票真係選民自己嘅，我做該做嗰份啫，我無能力撳個制就有幾多幾多票出嚟，有嘅我諗就平時可以瞓多陣」。

泛民同本土派嘅戰團，廣男冇興趣理會，因為兩邊都唔值得幫。廣男之所謂拎呢件事出嚟講，全因為呢件事可以再一次證明，主流泛民班人係幾咁唔民主，就連所謂「元老」、資深大律師嘅余若薇，本身嘅民主素養原來都只係咁？！再一次證明，選民用選票去懲罰呢班「取議席，為搵食」嘅人絕對正確！

泛民一直視選民為投票機器

根據余若薇批評鄺葆賢嘅一番言論，潛台詞係佢視選民為一班隨時隨地、任意受操制嘅投票機器，只要政治人物一聲號令，選民就必須歸隊，個個排住隊咁去畀票你班泛民。選民唔想投、唔出去投咩？選民冇理由唔聽政客話架喎，所以一定係負責嗰區嘅政客冇用心拉票啦！

大佬，呢啲咁嘅歪理，就連唔係讀政治學嘅廣男都駁到呢位資深大律師啦；正如鄺葆賢所講，啲選票唔一定係你泛民架，選民有自由意志決定支唔支持你班舊電池架！更何況，當傳媒翻查九西補選票站資料，竟然發現涵蓋兩個票站的黃埔花園選區，李卓人嘅得票都多過陳凱欣，試問咁都仲可以「賴」？選民唔喜歡你，覺得你班人唔值得擁有一票，自然唔會投畀你；亦正因為選民有智慧去選擇投唔投畀你，所以你班人先會輸完再輸！余若薇，你咁都唔明呀？

余若薇言行反映公民黨傲慢特質

余若薇呢啲「屈人唔拉票」論，其實同之前嘅「鎅票」論如出一轍，同樣係唔認同選民有智慧可以自己做選擇。講到底，敗選只係得一個理由，就係唔夠對手多票、唔夠對手多人支持，成日諗住選民一定要聽自己支笛，即使明明自己做得唔好，竟然覺得選民含淚都要搵票？簡簡單單一句話，已經凸顯公民黨，甚至整個泛民主派嘅傲慢同目空一切，所以話公民黨係「政治藍血人」真係一啲都冇錯！

圖片來源：RTHK