吓？公民黨全面擁抱「人大釋法」？仲暗示香港法律都一定要「釋咗法」先有效？珍珠都冇咁「真」呀，公民黨主席梁家傑今日喺《生果報》一篇報道裡面講到，人大常委就《基本法》第104條嘅釋法內容並不包括村代表選舉，故此若然選舉主任用釋法嚟做DQ朱凱迪嘅擋箭牌，恐怕政府亦保選舉主任唔到咁話。咦，乜個邏輯咁奇怪嘅，選舉主任都未話DQ，而家只係跟香港法例要求朱凱迪澄清之嘛，梁家傑咁講，即係就算香港法例寫到明，其實亦要人大釋法先算有效？

本地法例要「釋法」才有效？

「自決派」立法會議員朱凱迪參加村代表選舉，由於疑似主張違反《基本法》嘅「自決」立場，選舉主任逼不得已多次要求朱凱迪佢澄清，到底「港獨」係唔係佢口中「自決」嘅選項。朱凱迪一方堅持唔肯正面回覆；而公民黨「資深大律師」梁家傑為咗幫朱凱迪護航，亦歪理盡出。梁家傑接受《生果報》訪問時無啦啦話，如果選舉主任DQ朱凱迪，咁就係喺《基本法》「僭建上再僭建」。

《生果報》同梁家傑呢個邏輯其實好奇怪，點解呢，囍雨尋日其實亦已經講過，選舉主任係根據《鄉郊代表選舉條例》第24條、《選舉程序（鄉郊代表選舉）規例》第7(3)條同第10(1)條呢三條本地法例去要求朱凱迪澄清「自決」立場。梁家傑嘅分析之所以有問題，正因為佢由始至終都無視上述三條本地立法，猛話當年人大常委就《基本法》104條嘅釋法內容並不包括村代表選舉，所以高等法院喺「陳浩天選舉呈請案」所講嘅內容亦唔適用。

無視現行法例 梁家傑以偏概全

查實梁家傑咁講，好明顯係以偏概全喇。就當上述釋法同陳浩天選舉呈請案冇出現過都好，但上述三條法例的確係現行有效嘅香港法例，選舉主任只係依法辦事去要求朱凱迪澄清，偏偏梁家傑就講到好似香港法例冇畀人大釋過法，又或者《基本法》冇提過就唔適用咁，呢個絕對係對香港法律制度嘅曲解！枉佢身為資深大律師，其實真係幾好笑。

況且，按梁家傑邏輯，即係話選舉主任喺村代表選舉裡面只係橡皮圖章，就算被提名人唔係真誠擁護《基本法》，但只要佢肯簽，選舉主任就一定要「信納」；唉，呢啲推論竟然出自一個資深大律師嘅口，真係香港嘅悲哀。話一個簽署「法定聲明」嘅人，唔需要為所簽內容負責，拎到邊一個普通法法庭都真心冇乜可能贏，梁家傑為咗包庇「自決」同「港獨」，竟然連咁基本法律原則都曲解，香港人，睇清楚公民黨真面目啦！

圖片來源：大公報