獲得傳統主流泛民主派支持同聲援嘅工黨李卓人，早幾日喺立法會九龍西補選敗於建制派代表陳凱欣。敗選唔夠幾日，傳統泛民主派人士又嚟料，三個泛民主派背景嘅「時事評論員」近日錄製網台節目，講講吓「長毛」可能會參加未來嘅新界東補選，其中一個無啦啦拎「本土派」藝人杜汶澤出嚟講，話佢係建制派嘅「鬼」，如果唔係杜汶澤個老婆冇可能繼續有內地嘅工作等等。是咁的，泛民玩「民主霸權」唔係第一次，只係估唔到「長毛」連官司都未打完，呢班人已經發功啫！

主流泛民發功打本土

網友有睇問廣男寫啲文都知道，小弟喜歡上網，亦好喜歡聽台節目同睇討論區，就算好多觀點唔同都好，集思廣益嘛。今日咁啱上網睇討論區，竟然畀廣男見到一個帖，裡面大鬧杜汶澤係「鬼」，如果唔係點會忽然本土，而太太田蕊妮又繼續可以喺內地工作吖等等。過咗冇幾耐，廣男就見到杜汶澤大鬧嗰個網台節目主持，即係社民連前主席陶君行，由於粗口太多，請恕不能節錄，總之就係嚴詞否認啦。

嗱，講清楚先，廣男喺呢度並唔係要分析邊個係「人」、邊個係「鬼」，因為冇證冇據下，廣男係唔會亂吹一通嘅。廣男想講嘅係，呢一班所謂傳統泛民，其實個個內心都唔係真正相信民主、唔係真正相信選民，否則嘅話，又何必咁早就將「非我族類」嘅人歸類為「鬼」呢？

疑似又想欽點「長毛」參選

唔係吹水架，大家只要聽一聽個節目就可以知道，三個主持人明明係講緊被DQ咗嘅「長毛」，分析若然佢下次參加補選，會有咩優勢同劣勢。先唔好講「長毛」就住DQ案上訴嘅官司都未完，咁早講派佢出嚟補選其實勁多餘，就當「長毛」官司真係敗於，法庭維持DQ原判都好，乜個懸空咗嘅議席一定要由「長毛」去填補嘅咩？泛民主派裡面嘅人又唔畀去爭呀？又想玩「欽點」遊戲，搵「長毛」去代表泛民出選呀？

議席懸空咗，理論上就所有合資格人士都可以參選架啦，呢個先係民主原則嘛，不過呢啲真正嘅民主理論，偽民主派又點會明白吖。作為「長毛」黨友，陶君行無啦啦搵個稻草人出嚟打，用意真係好明顯：咪就係向「非主流」反對派，包括本土派發出警告，叫佢哋唔好諗住派人出嚟同「長毛」爭位囉！你出嚟爭，甚至根本冇話過出嚟爭，只要唔係主流泛民欽點嘅人，你就一定係「鬼」，佢哋就會用攻擊馮檢基咁相當嘅力度去攻擊你！嘩，真係好民主呀！！

泛民之敗 敗於不民主

中原集團創辦人施永青早排有篇文章，佢話李卓人之所以敗選，其中一個理由係連泛民主派支持者都開始覺得，泛民主派內部根本唔相信民主，更加唔相信選民可以自己作主。廣男真係好BUY呢個分析，今年九龍西兩次補選，泛民主派內部都出現破壞民主嘅情況，不幸嘅係，兩次都涉及馮檢基。唔知馮檢基睇到今次三位「時事評論員」嘅節目，會唔會別有一番滋味在心頭呢？

圖片來源：網台節目《城寨》截圖