「自決派」立法會議員朱凱迪參加村代表選舉呢單嘢搞到愈來愈大，選舉主任先後兩次去信，要求朱凱迪交代佢本人對「自決」嘅立場，可惜朱凱迪本人唔知乜嘢原因，寧願將一大堆法律意見放落回覆度，都堅持拒答到底佢本人，係唔係提倡或者支持「香港獨立」是自決前途選項之一。朱凱迪用緊嘅策略，其實就係質疑選舉主任冇權去問呢啲問題，但佢似乎忽略咗一個重要原則，就係一日法庭未話選舉主任引用嘅法例違憲，選舉主任其實都有責任根據相關法例去問佢嘢囉！

法例清楚列明選舉主任責任

由於呢單嘢涉及法律概念，囍雨盡量嘗試簡化，等一般讀者都睇得明。首先，朱凱迪之所以連參加村代表都要表明自己擁護《基本法》，全因為根據《鄉郊代表選舉條例》第24條，獲提名參加村代表選舉嘅人，即係朱凱迪啦，佢係需要簽署一份有法律效力嘅聲明，表明自己會擁護《基本法》同保證效忠香港特別行政區，否則就不會被裁定為有效提名。

好喇，咁選舉主任收到呢份聲明後，當然要判斷獲提名人，即係朱凱迪，簽署上述聲明嘅時候，係唔係真誠擁護《基本法》呢？呢一部份責任，喺《選舉程序（鄉郊代表選舉）規例》第10(1)條寫得好清楚，選舉主任係需要「決定」候選人係唔係獲有效提名。好喇，咁為咗作出呢個咁莊嚴嘅判斷，於是選舉主任就決定按《選舉程序（鄉郊代表選舉）規例》第7(3)條賦予嘅權力，要求朱凱迪提供提名表格沒有涵蓋而佢自己認為需要嘅資料。選舉主任呢兩項責任，全部白紙黑字列喺香港法例上面，冇花冇假架！

朱凱迪拒答問題，自有其他盤算？

複雜嘅法律概念講完，朱凱迪問題係咩呢？選舉主任尋晚問咗朱凱迪兩條簡單直接嘅問題：一）你本人，作為鄉郊代表選舉參選人，是否提倡或支持「香港獨立」是自決前途的選項？二）你本人是否同意，作為鄉郊代表選舉參選人，不能夠以任何方式主張「香港獨立」？兩條問題都係簡單嘅「YES」或「NO」問題，但係朱凱迪就堅拒回應，係都要拎一堆所謂法律意見出嚟反駁，質疑選舉主任所引用嘅法例「違憲」，總之反反覆覆用咗幾千字就係唔肯答「YES」或者「NO」！

朱凱迪作為香港公職人員（立法會議員），喺參選時自行放棄「否定港獨」嘅機會，大家覺得會係咩原因呢？囍雨喺呢亦唔揣測，大家自己判斷，唯一想同大家講嘅係，千祈好唔畀朱凱迪好似講到頭頭是道嘅回應誤導到。講清楚先，法院並冇宣判過選舉主任引用嘅法例「違憲」，既然係咁，即係話朱凱迪想做候選人的話，仍然需要答問題；佢當然有權唔答啦，但若然係咁，選舉主任就只好自行作出裁決喇。唔理到時有咩結果都好，唔該朱凱迪唔好再批評係「政治審查」或者「政治篩選」，呢名政客想出乜嘢招，一早畀人睇通啦！

圖片來源：香港電台即時新聞