前立法會議員「長毛」梁國雄，就住自己被法院DQ嘅上訴今日喺高等法院開審。以「長毛」性格，出庭前拉起橫額，大呼冤枉幾乎已經係指定動作；囍雨本來都見怪不怪，但一聽到佢講DQ案前因後果時歪理盡出，即時無名火起三千丈，雖然已經講過好多次，但對唔住，今次真係唔駁唔得。而家就等囍雨逐點反駁「長毛」嘅謬論，就算唔能夠以正視聽，至少都留個紀錄，等更多人知道佢有幾無理。

將責任推得乾乾淨淨

「長毛」喺庭外話喎，釋法將合法議員取消，對佢哋不公平對待是全香港人不公平對待；佢又話，根據《基本法》香港居民享有選舉和被選舉權，釋法就係將《基本法》條文放喺地下踩。「長毛」講嘅係唔係事實呢？你話佢錯晒又唔係，只不過講啲唔講啲，而且將成班被DQ議員嘅責任推得一乾二淨啫！

冇錯，全國人大常委會的確係由於有多名今屆立法會議員宣誓時候玩嘢，甚至公然以粗口同「支那」等字眼辱華，所以就住《基本法》第104條釋法。但大家千萬唔好唔記得，如果唔係有班人「宣誓玩嘢」在先，全國人大常委會又點可能無啦啦走去釋法？況且，釋法根本就係《基本法》一部份，亦係香港法律制度一部份，「長毛」不斷嘈嘈嘈，只係代表佢唔知「法治」為何物。

政府宣誓前提醒「不得玩嘢」

再者，有一點大家同樣好易唔記得，就係現屆立法會議員宣誓之前一日，即係2016年10月11日（星期二），特區政府公開發出一篇聲明，再三叮囑立法會議員喺新一屆立法會會期開始時宣誓，除咗係一個莊嚴儀式，亦係符合法例要求嘅必要之舉，因為呢個係一項憲制性要求。

唔只咁喎，政府仲特別提醒，根據夏正民法官2004年嘅判決，作出符合《基本法》第104條規定嘅誓言，係所有候任立法會議員嘅「強制性憲制責任」，而立法會議員更必須以符合《條例》嘅方式及形式宣誓，而夏正民法官亦指出，如果議員以不符合《條例》方式或形式作出誓言，因而改變誓言嘅實質意義，其誓言便違反《基本法》第104條，屬不合法同無法律效力，而如果證實係拒絕或忽略作出誓言，該名立法會議員就必須「離任」或「被取消其就任資格」。

「長毛」沒理由不知道宣誓要求

囍雨點解花咁多時間去講呢篇政府聲明？因為夏正民法官呢單案，入稟人正正係「長毛」自己呀！「長毛」十幾年前已經嘗試挑戰宣誓嘅形式同誓詞內容，但就遭到香港法院駁回佢嘅申請，亦即係話，作為敗訴嘅一方，「長毛」冇可能唔知道，宣誓嘅時候唔可以自行創作誓詞內容，但大家應該記得啦，佢2016年宣誓嘅時候，係宣誓前後都加入「政治口號」，高等法院亦認同係屬於改變誓詞內容，喺呢個情況下，佢被DQ仲可以怨人？唔係咁無賴嘛？

講到底，法庭判例早就存在，只係「宣誓玩嘢」嘅一眾反對派議員視而不見，唔該你班人唔好再話「釋法」係搬龍門，因為龍門根本一直存在，只係你哋班人當佢冇到！上屆特首梁振英，堅決履行特首執行《基本法》嘅憲制責任，上訴庭亦已經確立呢個做法，仲認同執行方法就係提出司法覆核添。「長毛」到咗今日仍然要老屈政府迫害佢，做政客做到佢咁無賴，真係唔做好過做啦！

圖片來源：港人講地