立法會九龍西補選已經結束，落選者李卓人今日接受電台節目訪問時繼續大發謬論，其中一句令廣男聽到耳都側埋嘅，係李卓人竟然話喎，政府當日DQ晒反對派裡面嘅後生仔，所以令到反對派後生一代上唔到位。嘩，話政府令到反對派後生仔上唔到位？到底件事係唔係咁先？到底係你班民主派「大佬」阻住班後生仔上位，定係政府唔想班後生仔上位，李卓人講清楚好喎！

反對派被DQ全屬咎由自取

老實講吖，話「政府DQ晒反對派裡面嘅後生仔」，呢句說話本身就有問題。政府點解會申請入稟DQ羅冠聰同劉小麗先？係因為佢兩個「宣誓玩嘢」，擺明唔遵守《基本法》同《宣誓及聲明條例》嘅規定吖嘛！如果佢兩個唔係違法在先，上屆梁振英政府又肯挺起胸膛點入稟，佢兩個點會被DQ？你當香港法院傻架？

仲有一點，李卓人唔好唔記得呀，當日政府喺立法會議員宣誓之前，專登發咗一篇公開聲明，忠告、提醒各位候任議員，根據香港法院案例，佢哋係必須依照法定格式同誓詞內容去宣誓，呢班人唔聽勸告，只可以話係咎由自取！至於話政府嘅選舉主任DQ某啲候選人，令佢哋連閘都入唔到，道理一樣簡單：被DQ參選資格嘅人，包括：「香港眾志」周庭（所屬組織支持「自決」，即香港可以單方面決定政治前途）、劉小麗（曾公開表示「港獨」係香港選項）、梁天琦同陳浩天（支持「港獨」）等等，全部都高舉一啲《基本法》條文有衝突主張，選舉主任唔信納佢哋做得到「真誠擁護《基本法》」呢個法定要求，自然唔批准佢哋參選！李卓人咁都拎嚟講，唔通真係當選舉主任係橡皮圖章？但高等法院唔係咁講喎！

連初選都唔搞 剝奪年輕人機會

講完DQ，梗係要講吓反對派裡面嘅「大佬」文化。上一次九龍西補選，反對派整色整水都扮晒嘢會搞個初選，等各黨派有志參選嘅年輕人都可以試一試，博一博成為反對派嘅代表。好似民主黨嘅袁海文咁，當日都有報名喎，雖然佢係輸咗初選，但都叫做試過吖！點知去到李卓人呢次，反對派直頭連初選都費事搞，直接由被DQ嘅劉小麗欽點李卓人去參選，咁大家話喇，到底係邊個阻住反對派班後生仔女上位？反對派唔搞初選，唔通又關政府事？唔好玩啦！

反對派年輕一代上到位，其實唔係乜嘢特殊例子。好似民主黨許智峯（雖然品行勁有問題）同鄺俊宇、公民黨譚文豪同楊岳橋等等，佢哋全部可以成功交棒喎，你李卓人又有乜解釋？只要反對派參選人係真誠擁護《基本法》，唔好走去搞「港獨」、「自決」，入閘參選根本不成問題，所以講到尾，最阻住地球轉嘅根本就係李卓人呢類反對派「大佬」！好心啦，唔好再搵嘢去「賴」啦！！

圖片來源：黃之鋒個人社交網站短片截圖