九龍西補選嘅結果終於出咗，建制派代表陳凱欣以106,467票擊敗其他候選人成功當選，而競選個陣口水多多嘅李卓人，就算加埋馮檢基嘅得票，兩個人加埋都仲要輸陳凱欣九百票。李卓人點解會輸、陳凱欣點解會贏，坊間有好多解讀，大家固然可以參考，不過囍雨認為，有一個細節其實大家都忽略架咗，就係喺今次選舉過程中，李卓人嗰一邊就曾經出現非常多嘅「奧步」（茅招）同「不君子行為」，香港市民已經非常成熟，見到李卓人隊人咁多污糟手段，自自然然唔會投畀佢啦，道理其實好簡單啫。

李卓人團隊多「古惑」

選舉結果既然塵埃落定，我哋又不妨Fact Check一吓李卓人團隊做過乜衰嘢。先係李卓人嘅支持者、「人民力量」副主席「快必」譚得志，佢先後多次趁陳凱欣落區走去追擊，一次係黃埔、另一次就係石硤尾。以石硤尾嗰次為例，「快必」帶隊到場搗亂，先係喺度大叫話陳凱欣「義工」係收咗錢嘅黑工，之後又叫人哋女性義工做「大媽」，叫佢哋跳「大媽舞」，最後更加無禮貌到問一個老婆婆「仲有無大姨媽」等等。做得出呢啲劣行，當然會受到各界批評啦；不過你以為李卓人團隊會因此反省收斂咩？咁諗就錯喇，因為唔夠兩日，劉小麗又走出嚟「幫倒忙」，同陳凱欣一齊喺美孚拉票，竟然有正經事唔做，主力追擊對手、騷擾人哋宣傳。

所謂物以類眾，人以群分，李卓人包庇自己團隊嘅不君子行為，本身已經係罪大惡極，而且非常之「反民主」。陳凱欣落街先後多次被李卓人團隊「招呼」，次次都有短片為證，睇過嘅選民都不知幾多，見到你成班大男人咁樣喺街到「蝦」個女性，真係想投你都投唔落手。好彩，面對對手不斷嘅追擊滋擾，陳凱欣仍然好有風度咁回應，「我只想努力建設，不想再見到肆意破壞」，邊一個更得民心？高下立見啦。

票唔係鬧返黎

以為類似嘅滋擾去到投票日就結束？梗係唔會啦。李卓人團隊去到最後依然選擇用暴力嘅方式去妨礙陳凱欣宣傳，其中更大量短片拍到，陳凱欣被香港眾志黃之鋒帶人逼到埋牆，無路可以走需要警察救援先走得到；咁仲唔止喎，黃之鋒等「壞蛋」一路用大聲公對住陳凱欣助選團大叫，有佢講無人講，我係準備進入票站嘅選民，見到呢一幕，你估仲會唔會投畀李卓人呢？

囍雨覺得，李卓人好心你唔好再「賴」咩天氣、又話有人「鎅票」、又話選民「心淡」咁，查實你有冇諗過自己喺政壇同競選既經驗都比陳凱欣豐富，點解大部份選民仍然決定投畀陳凱欣？先不論政治立場，單係你班人用呢種可恥嘅手法拉票，已經足夠令選民對你失望啦，你班人口口聲聲話「追求民主」，但連競選都用暴力同騷擾手法去阻止對手拉票，試問市民仲點期待你喺議事堂同人理性議事？一言不合就搞破壞，呢個咪就係香港人「唔BUY」你同反對派嘅原因囉。

圖片來源：大公報