「日日新鮮、日日甘」，連續寫咗幾日美國總統特朗普啲衰嘢，本來都開始寫到悶悶哋，點知特朗普日日做錯事，搞到囍雨題材不斷，欲罷不能。最新鮮滾熱辣嘅一單，係特朗普公然美國某位法官做「奧巴馬法官」，意即無啦啦為法官扣上「政治帽子」，侮辱審案時有既定政治立場，唔可以公正處事。特朗普冇證冇據下講埋晒呢啲嘢，自然會引嚟公憤啦，仲搞到美國最高法院首席大法官罕有咁發聲明不點名反駁呢啲言論。雙重標準、種族歧視、單邊主義，而家仲公開侮辱法官，都係嗰一句，美國仲有乜嘢資格手指指干預其他國家內政先？

特朗普以為自己凌駕法律

是咁的，話說特朗普本月初針對中美洲偷渡潮而下達「總統公告」，要求申請政治庇護者須在官方口岸入境美國，否則不會受理，客觀而言就係禁止所有非法移民申請「政治庇護」。三藩市地區法院法官泰格喺美國時間星期一發出臨時禁制令，指特朗普嘅決定違反移民法，又指總統亦都冇權「凌駕法例」。

一向妄自尊大、目空一切嘅特朗普見自己身為美國元首，連作出一個決定亦都被法官禁制，一怒之下，竟然失常咁批評由前總統奧巴馬任命的泰格係「奧巴馬法官」，仲話自己嘅陣營冇辦法喺第九巡迴上訴法院嘅官司中獲勝，明示暗示法院「偏袒」自由派。仲唔止咁喎，特朗普仲形容情况「可恥」，又聲言要做重大申訴，等同類情况唔再發生咁話。

無理批評法官 破壞法治

睇到呢度，相信囍雨嘅讀者都會認同，特朗普好有可能已經接近失常。首先，委任法官係美國總統嘅職權範圍，由法律明文規定，特朗普自己都係總統，亦都有呢項權力，唔通佢意思係指，由佢委任嘅法官就一定會對佢言聽計從，一定會作出對佢有利嘅判決？若然係咁的話，咁美國就唔係「法治」，而係「人治」喇喎！

再者，法官就特朗普嘅命令下禁制令，全因認為呢項決定違反美國嘅移民法，簡而言之就係「對事不對人」，以法律考量為先，仲講明總統亦都唔可以凌駕法律。哈，真係好笑喇，真心想問問特朗普，到底呢位法官所講嘅有咩問題？唔通佢唔認同，總統亦唔可以凌駕法律？若然係咁的話，咁美國就唔係「法治」，而係「人治」喇喎！！

為法官扣「政治帽子」 特朗普明顯失常

第三，特朗普唔係跟住司法程序去上訴，反而選擇出口剩為自己國家嘅法官扣上「政治帽子」，呢啲咁嘅行為，毫無疑問係對美國法治嘅踐踏同侮辱。有得畀你上訴又唔去做，未卜先知咁話自己上訴一定無望，因為成個法院都傾向自由派、有既定政治立場云云。呢啲咁無的放矢嘅指控，竟然出自世界上最大權力嘅男人口中，大家話得唔得人驚先？

特朗普公然破壞法治、侮辱法官嘅行為，搞到連最高法院首席大法官羅伯茨亦要發表聲明，不點名咁反駁話，美國「冇奧巴馬法官或者特朗普法官，布殊法官或克林頓法官」，強調美國司法機構獨立，現職法官都竭盡所能一視同仁對待所有參與審訊者，又話所有美國人亦應當為司法獨立感恩。

美國國會不務正業 監察總統當務之急

美國國會早前發表報告，批評中央政府干預香港高度自治範圍嘅工作，恐嚇話要撤去香港獨立關稅區等等。囍雨唔知佢哋係點得出以上結論，唯一肯定嘅係，報告內全無實證可言；相反，特朗普破獲法治、干預司法獨立，惡行彰彰明甚擺喺眼前。睇返畀美國國會批評嘅香港，司法獨立受到國際肯定，早前法院亦喺政總東翼前地司法覆核案中判特區政府敗訴，特區政府亦即時表明尊重法院判決！呢啲咪「法治」同「司法獨立」精神囉，美國國會唔該唔好再掩耳盜鈴，專心監察返自己個總統，唔好畀佢作威作福好過啦！拜託！！

原圖：Xinhuanet