喺美國霸權之下，「順美者昌、逆美者亡」並唔係一句戲言。事實上，美國經常介入其他國家嘅內部事務，高舉自由、民主、人權同法治等等所謂普世價值去指控人哋國家政府做得唔好，動不動就去制裁一啲美國自己睇唔順眼嘅國，見住美國咁橫行霸道，大家不禁要問：「乜美國真係咁正義嘅咩？」答案梗係唔係啦，最近之嘛，美國總統特朗普就死攬自己個「盟友」沙特阿拉伯，明知沙地派人暗殺異見記者亦無動於衷。今日，就等囍雨同大家上返堂歷史堂，重溫一下美國呢個霸權國家處事係幾咁雙重標準啦！

美國包庇盟友是常態

沙地王儲派人刺殺異見記者卡舒吉，證據外界就得唔到架喇，不過偏偏講出呢個結論嘅，正正係美國自己嘅情報機構中央情報局。特朗普唔理、唔理自己國家嘅情報機構，堅持話事件「未有定論」，唔肯制裁沙地之餘，仲話明會繼續向沙地售武。大家試想一下，如果呢件事係發生喺同美國唔妥嘅國家身上，美國會點做呢？制裁就少不免架喇，一個唔覺意，美國仲隨時出兵打你添呀，問你驚唔驚！

囍雨份人一向好公道，美國偏袒自己「盟友」真係唔係第一次架喇，而且有非常悠久嘅歷史添！就早幾年之嘛，美國另一個喺中東嘅老友以色列，用重型導彈狂轟濫炸加沙地帶，結果導致超過一千人死亡、七千人受傷，死傷者中絕大部份被證實係平民！嘩，炸死平民喎，就算打緊仗都隨時係犯戰爭罪行啦，咁成日扮晒世界警察嘅美國又有咩反應呢？答案係：冇反應！繼續包庇、縱容、維護以色列呢啲咁無人性嘅行為。

美國雙重標準有悠久歷史

睇到呢度，可能有人會問：美國係唔係對住中東先係咁咋？囍雨可以好肯定答：梗係唔係啦！大家記唔記得西班牙嘅著名獨裁者弗朗哥將軍呀？喺四十年代二次大戰後，弗朗哥成為西班牙統治者，經常大肆搜捕、關押、處死異見人士，但由於佢反對共產主首，因而得到美國支持，在明在間支持佢推行專制獨裁的統治。講到底，一切都係為咗「利益」兩個字，只要美國認為有「利益」所在，佢就會介入、縱客、包庇。

香港部份盲反派政客，成日視美國所講嘅嘢係金科玉律，好似逢係美國所講嘅就必然正確，而且神聖不可侵犯咁。好似最近美國國會發表一份不盡不實嘅報告，批評香港高度自治受到中央政府蠶食云云，嗰啲盲反派政客一見到份報告，立刻如獲至寶咁大肆攻擊中央同特區政府，但究竟份報告內容係真定唔真呢？唔使理架喇、唔使知架，抽到水咪得囉！香港市民，大家睇清楚呢班政客真面目未呀？喺大國博奕之時甘願做人棋子，囍雨就真係覺得好可恥喇，唔知大家又點諗呢？

原圖：新華網