高等法院近日裁定，指政府行政署對政總東翼前地範圍嘅使用守則過於嚴苛，不合比例咁限制咗公眾人士喺上址行使言論自由，宣布行政署嘅規定係違憲。對於法院嘅判決，特區政府都表明會尊重，改規定只係時間上嘅問題，偏偏呢個時候，年前曾經因為參與衝擊政總東翼前地而被判監嘅「暴力犯」黃之鋒竟然好意思走出嚟「抽水」，話如果有關行政署違憲嘅裁決更早出現，就未必有佢單案出現，明示暗示自己好似坐冤獄咁！係咩？乜真係冤獄咩？但終審法院唔係咁講喎！

終審法院明言不容暴力

 喺講終審法院當日判決之前，我哋其實好應該先睇睇今次司法覆核裡面，法庭係點樣講。其實今次法官之所以話政府違憲，並唔係話政府對政府場地制訂使用守則有錯，而係話「太嚴」，只要放寬返個使用規定，而且去到一個合乎比例嘅程度，咁就其實已經冇違憲喇。

好喇，講返黃之鋒單案，到底終審法院當時係點講呢？終審法院喺「衝擊政府總部東翼前地案」頒下嘅裁決書裡面話，單案涉及嘅行為已經違反刑事法同涉及暴力，已經唔係和平非暴力，因此判刑時以公民抗命為理由，要求法院輕判，應得嘅比重的確只係甚少。終審法院首席法官馬道立又特別提到，完全同意上訴庭認為日後對同類案件，應該採取更嚴苛判刑指引，又強調香港是和平社會，即使犯罪目的涉及公民抗命，若然超越暴力界線的話，公民抗命亦唔可以成為抗辯理據。

暴力是黃之鋒坐監主要理由

簡單啲講，當日終審法院之所以判黃之鋒等人要坐監，全因黃之鋒等人使用暴力，包括令到保安員受傷。「暴力」兩個字，正正係黃之鋒等人需要坐監服刑嘅關鋒，因此即使今日高等法院話，政府有關政總東翼前地嘅使用守則因為太嚴厲而違憲都好，咁唔代表黃之鋒等人所坐嘅「冤獄」。大家試諗吓，政府場地即使係開放畀公眾使用都好，一般都一定會規定開放時間，黃之鋒等人衝入政總東翼前地嗰一刻，根本已經係深夜，一早過晒正常開放時間啦，班人仲要使用暴力喎，大家話，兩單案邊度可能有關係先？

嗱，囍雨唔係得個「講」字架，連立場一向偏向反對派嘅港大學律學者張達明亦認同，黃之鋒佢哋單刑事檢控，主要是針對被告有冇行為不檢、影響公眾安全，跟政府的行政指引係唔係違憲，佢睇唔到有關連。張達明仲強調一點，始終黃之鋒佢哋當晚係冇申請，並唔係申請之後不獲批，所以唔認同兩者有關係。

不懂自省、諉過於人 黃之鋒仲想從政？

係囉，即係張達明都認同，黃之鋒佢哋之所以坐監，癥結咪就係因為使用「暴力」囉！換句話講，你示威同抗議嘅時候一用暴力，喺香港法律層面你就一定「錯晒」；「錯晒」嘅情況下仲喺度明示暗示自己坐「冤獄」，咁即係死不悔改、永不自省。好似黃之鋒呢種咁嘅人，事事剩係識諉過於人，永遠唔識反躬自省，竟然仲喺法庭到講明自己想選立法會喎，大家話係唔係笑話中嘅笑話吖，節省少少啦，拜託！

圖片來源：大公報