「違法佔領」九名疑犯被起訴案件開審，包括戴耀廷等九個被告除左否認控罪之外，又發聲明稱控罪「賦予政府過度檢控權、有損言論及集會自由」云云；當外界唔少人都話九個被告「走數」嘅時候，囍雨睇《生果報》頭條報道，直情寫「佔中九子案開審『何罪之有』」，言下之意，係咪即係法庭都未審完單案，《生果報》就想話九個被告「無罪」呢？

「吸引眼球」的標題

囍雨今日行過報紙檔，見到《生果報》大字標題寫住「佔中九子案開審『何罪之有』」呢個標題，真係當堂嚇咗一跳，件案好似噚日先開審，《生果報》咁快就話人「何罪之有」；囍雨睇下內文，原來《生果報》咁寫係因為其中一個被告鍾耀華喺庭上反問「何罪之有呢？」，而另一被告黃浩銘就稱「「我要真普選，雨傘運動無罪」，於是《生果報》就得出「何罪之有」呢個題，呢條題嘅意思，囍雨理解為九個被告應該「無罪」。

問題就嚟喇，根據《生果報》自己嘅報道，鍾耀華喺庭上問「何罪之有呢？」基本上係一個問題，大抵意思就係「我哋（或者我）邊度有罪呢？」，但《生果報》將重要嘅問句變成陳述，變為「何罪之有」，畀人感覺就好似將一個被告問人佢邊度有罪，變成講被告「無罪」咁；喂，單案啱啱先開審，《生果報》就用「何罪之有」做頭版標題，會唔會畀人錯覺以為「違法佔領」九個被告都應該係無罪，甚至令人誤會被告已經無罪呢？

小心影響法庭審訊

做傳媒，標題、內文要「吸睛」，囍雨係理解嘅，但係《生果報》喺案件啱啱開審就講到被告「無罪」咁，會唔會影響到公眾對案件嘅觀感？甚至借此透過公眾壓力反過來向法庭施壓呢？老實講，《生果報》偏幫盲反派，基本上就係人所共知嘅事，但係喺案件審訊期間，《生果報》就用頭版報道疑似暗示被告「無罪」，實在係太踩綱線喇！囍雨奉勸《生果報》，報道還報道，都係小心啲好，萬一有人認為《生果報》係想向法庭施壓，咁就唔係幾好啦！

原圖：《蘋果日報》截圖